„Þetta er miklu stærra en fólk gerir sér grein fyrir“

„Undirbúningur hjá mér byrjaði í september, þá byrjaði ég að hugsa hvað ég vilji gera, hvernig ég vilji hafa atriðin og hvern ég vil hafa í hverju atriði,“ segir Elma Rún Kristinsdóttir, einn eiganda Ungleikhússins, er fréttastofa náði tali af henni.

„Svo byrjuðum við að æfa í lok nóvember og desember og svo á fullu í janúar og febrúar. Svo kom forkeppnin í febrúar.“

Gríðarlega mikill tími fer í æfingarnar en nemendurnir æfa í allt að átta klukkustundir á hverjum degi. Æfingasvæði sviðslistaskólans er í Reykjanesbæ en einhverjir dansarar koma þó frá höfuðborgarsvæðinu.

„Við erum með krakka sem taka Strætó á hverjum degi úr Reykjavík til að koma á æfingar. Það er búið að vera alvöru metnaður hjá nokkrum sem taka Strætó á hverjum degi.“

Elma segist þakklát bæði hópnum en einnig foreldrum og kennurum hópsins.

„Ég finn alveg að það er mikil ástríða að baki þessu,“ segir hún.

„Ég er ótrúlega heppin og með ótrúlega frábæran hóp í kringum mig, bæði kennarar og foreldrar.“

Aðeins 8500 af 120 þúsund dönsurum fengu að stíga á stóra sviðið

Ungleikhúsið er meðal sex íslenskra dans- og sviðslistaskóla sem ferðuðust til Burgos á Spáni til að taka þátt í Dance World Cup. Hinir eru Danskompaní, Dansskóli Birnu Björns, Menningarfélag Húnaþings Vestra, Dansakademían og Danslistarskóli JSB.

Til að tryggja sér þátttökurétt í keppninni sjálfri þurfa dansararnir að fara í gegnum forkeppni í sínu heimalandi. Yfir 120 þúsund dansarar í fimmtíu löndum keppast um að komast á stóra sviðið en einungis 8500 fengu tækifærið. Þar á meðal voru 51 dansari Ungleikhússins.

Elma Rún samdi 23 af 24 atriðum Ungleikhússins og sópaði að sér verðlaunum í Burgos. Alls unnu atriði sviðslistaskólans níu heimsmeistaratitla, fjögur silfurverðlaun og þrjú bronsverðlaun auk átta svokallaðra Grand Finals verðlauna.

Verðlaunin sem Ungleikhúsið hlaut eftir keppnina voru í raun svo mörg að Elma átti í mestu vandræðum með að koma þeim aftur til landsins.

„Ég stóð og horfði á alla bikarana og hugsaði hvernig ég ætti að koma þessu heim. Með fullt borð af bikurum og sex stóra myndaramma,“ segir hún og má heyra smá hlátur í gegnum símann.

Ekki eins og hefðbundin fótboltamót

Danskeppni líkt og þessi er hins vegar ekki eins og hin hefðbundnu fótboltamót sem Íslendingar þekkja þar sem keppt er um einungis einn bikar. Elma segir uppsetningu danskeppninnar oft flækjast fyrir fólki en hægt er að keppa í ótalmörgum flokkum.

„Þess vegna eru þetta margir titlar oft, af því þetta er skipt í aldursflokk, hversu margir eru í atriðunum og hvaða dansstíl þetta er í. Þess vegna er þetta oft flókið að skilja,“ segir hún.

Í fyrsta lagi er dönsurunum flokkað í fjóra aldurshópa, lítil, börn, yngri og eldri (eða mini, children, junior og senior). Þá skiptir einnig máli hversu margir dansarar séu í hverju atriði, en hægt er að vera einn, í dúett eða tríó, í litlum hópi eða stórum hópi.

„Við vorum með keppendur á öllum aldri, yngsti keppendurnir okkar eru fjögurra ára og þeir elstu 25. Það er gaman að segja frá því að við erum með fjögurra ára heimsmeistara.“

Til að keppa í flokki stórra hópa þurfa ellefu eða fleiri dansarar að stíga á svið, en engin takmörk eru á fjöldanum. Til að mynda fylgdist Elma með atriði þar sem 88 dansarar stigu á svið.

Að lokum er flokkað eftir hvers konar dans sé um að ræða en það eru ótalmargar tegundir, til að mynda söngur og dans, ballett, hipp hopp, nútímadans og jazz. Það er því fjöldinn allur af titlum sem keppt er um.

„Þetta er í raun miklu stærra en fólk gerir sér grein fyrir.“

Fékk verðlaun sem danshöfundur

Einn lið keppninnar mætti hins vegar líkja við hið hefðbundna fótboltamót, Grand Finals. Stigahæstu atriði keppninnar fá tækifæri til að keppa gegn hvoru öðru, óháð aldri, dansstíl eða stærð hópa.

„Það eru átta atriði frá okkur sem fengu keppnisrétt á Grand Finals,“ segir Elma.

Líkt og kom fram hlaut Ungleikhúsið sjö verðlaun Grand Finals keppninnar en að auki voru tveir nemendur Elmu sem fengu sérstakan skólastyrk í dansskóla í Barcelona. Þá fékk Elma sérstök verðlaun fyrir störf sín sem danshöfundur.

„Það er ótrúlega gaman og hvetjandi að fá þannig verðlaun þegar maður er búinn að vera vinna og búa til og skapa að fá að vita að það er einhver að njóta þess sem maður er að gera.“

Þetta er þó ekki í fyrsta skipti sem atriði samið af Elmu stígur á svið Dance World Cup en hún hefur áður samið atriði fyrir Danskompaní. Eftir að hafa stofnað Ungleikhúsið og komið á fót eins árs námskeiði í söngleikjadansi, auk Signýjar Blöndal og Ninnu Stefánsdóttur, var ákveðið að halda aftur í keppnina.

Auk þess að æfa fyrir keppnina hefur hópurinn sett á svið söngleik og gert myndskeið líkt og sjá má hér

„Það er einn flokkur sem heitir Children small group song and dance sem ég er búin að vinna fjögur ár í röð,“ segir Elma.

„England og Skotland eru orðin frekar fúl þegar þau vita að þau eru að keppa á móti okkur, þau áttu þessa flokka fyrir.“

Ætlaði aldrei að fara reka sviðslistaskóla

Er fréttastofa náði tali af Elmu var hún komin í örstutt sumarfrí og var í hennar orðum enn að reyna lenda eftir keppnina. Framundan hjá henni er verkefni á vegum Þjóðleikhússins.

„Ég er með dans- og sviðshreyfingar í Línu Langsokk í Þjóðleikhúsinu líka, svo ég ætla að taka mér smá pásu áður en ég fer að semja meira,“ segir hún.

Þá eru einnig framundan annað ár í Ungleikhúsinu og fara fram prufur í ágúst. Elma segir stefnuna aldrei hafa verið að fara reka sviðslistaskóla.

„Þetta hefur gengið framar vonum og allir voðalega ánægðir. Við fengum pressu frá foreldrum og krökkum að halda áfram. Ég ætlaði aldrei að fara reka einhvern skóla en svo voru allir svo ánægðir.“

Hér má sjá lista yfir í hvaða flokkum Ungleikhúsið varð hlutskarpast: