Landa í Grindavíkurhöfn og botna ekkert í lokunum

Elvar Hreinsson framkvæmdastjóri Klafa löndunarþjónustu keyrði um hafnarsvæðið á lyftara enda var Bergey að koma í höfn. Hann segir eldgosið ekki trufla löndunina hið minnsta.

„Ég kom bara hingað til Grindavíkur því það átti að vera löndun. Ég kom bara og byrjaði að landa,“ segir hann. 

Hann kveðst ekkert botna í löngum lokunum enda gosið langt frá byggð.

„Það er ekki langt frá okkur og hefur engin áhrif á okkur,“ segir Elvar.

„Ég skil ekki af hverju það er verið að loka svona lengi. Það er allt í lagi að loka í einhvern smátíma á meðan verið er að kanna þetta, en af hverju er verið að loka svona lengi. Hér eru fyrirtæki sem þurfa á túristum að halda og þjónustu. Það á bara að opna þetta,“ segir hann.