Ekki stóra málið hvað við köllum „leyni­þjónustuna“

Þorgerður Katrín fór í viðtal hjá The Economist í júlí þar sem hún lét hafa eftir sér að hún styddi að stofnuð yrði íslensk leyniþjónusta. 

En í samtali við blaðamann Vísis víkur utanríkisráðherra undan því að svara beint hvort breska viðskiptablaðið hafi haft rétt eftir sér þegar fjallað var um stofnun hugsanlegrar leyniþjónustu á Íslandi. 

„Það sem að ég er segja, og sagði þarna, er að það er augljóst að við þurfum að byggja upp meiri þekkingu og meiri greiningargetu heldur en við höfum núna,“ segir hún innt eftir því hvort rangt væri eftir sér haft og bætir við:

„Hvað sem við köllum það, þá er það ekki stóra málið.“

Styðja þurfi við Cert-Is

Utanríkisráðherra segir skýrt að efla þurfi öryggisinnviði, byggja upp eigin þekkingu á öryggis- og varnarmálum, og styrkja stofnanir sem sinna öryggismálum; netöryggissveitina Cert-Is, Landhelgisgæsluna og Ríkislögreglustjóra.

„Í þessari stöðu í heimsmálum þurfum við að vera fókuseruð á það sem við þurfum að gera og getum gert og við þurfum að byggja enn frekar og styðja við þær stofnanir sem eru fyrir,“ segir hún og ítrekar: 

„Við þurfum einfaldlega að styðja þær áfram til þess að þær geti stutt þessi öryggis- og varnarsjónarmið sem að þær gegna nú í dag og það mun ekki minnka með árunum.“

Eigi í góðu samstarfi við Bandaríkin

Í kvöldfréttum Sýnar var rætt við Mörð Áslaugarson, sem er framkvæmdastjóri vefhýsingafyrirtækisins 1984 og var áður fulltrúi Pírata í stjórn Rúv, þar sem hann lýsti áhyggjum af því að íslensk stjórnsýsla sé nær öll orðin rafræn og hýst í bandarískum skýjaþjónustum. Það þýddi að bandarísk stjórnvöld gætu á grundvelli laga um þjóðaröryggi, sem sé undir núverandi Bandaríkjastjórn afar teygjanlegt hugtak, auðveldlega nálgast þau gögn.

Spurð út í þetta undirstrikar Þorgerður að samstarf við Bandaríkin á sviði varnar- og öryggismála hafi verið afar gott.  

„En eins og ég sagði áðan, staða heimsmála er einfaldlega þannig að við verðum að geta að einhverju leyti byggt upp okkar sjálfstæða mat á því hvað við þurfum að gera til þess að tryggja öryggi okkar, varnir og það sem við þurfum ekki síst til að tryggja okkar innviði.“ 

Mikil vinna hafi átt sér stað þvert á flokka um öryggis- og varnarmál og Þorgerður vonar að sú vinna haldi áfram.  

„Þannig að menn fari nú ekki í einhverja orðaleiki núna. Þetta er bara verkefni sem við þurfum að takast á við og þetta, sem og aðrar ógnanir og fleira.“