Af­mælis­dagurinn bara „venju­legur dagur“ og á ekki von á gjöfum

Brynjar á afmæli í dag og af því tilefni hringdu Heimir Karlsson og Lilja Katrín í afmælisbarnið í Bítinu í morgun, sungu fyrir hann afmælissönginn og ræddu við hann um afmælið.

Nú eru ekki nema tvö ár þar til þú færð frítt í Strætó.

„Takk fyrir að minna á það,“ sagði Brynjar.

Hlakkarðu ekki til?

„Jú, ég hlakka til,“ sagði hann.

Ertu í vinnunni?

„Ég er í vinnunni já.“

Við vorum ekkert á því að þú myndir svara, ertu þá ekki byrjaður að dæma?

„Jújú, ég er að skrifa hér merkilega dóma

Ertu eitthvað í dómssal í dag?

„Nei, nei, enda er ég bara í gallabuxum og illa til hafður.“

Það er nú ekkert nýtt.

„Að vísu ekki, að vísu ekki, en ég reyni að vera það ekki í dómssalnum.

Venjulegur dagur á skrifstofunni

En á ekki að gera eitthvað í tilefni dagsins?

„Nei, það er ekkert. Þetta verður bara venjulegur dagur hjá mér. 

Og hvernig er hann?

„Ég sit á skrifstofu minni. Ég segi það ekki, ég fer á kaffistofuna og tek einhver leiðindi, en það er bara venjulegur dagur.“

Heldurðu að það taki enginn upp á því að koma þér á óvart?

„Ég á ekki von á því nei, ég er það illa þokkaður hér.“

En heima hjá þér, konan hlýtur að bíða með eitthvað?

„Ekki varð ég var við það í morgun þegar ég vaknaði.“

En færðu einhverjar gjafir?

„Nei, ég er bara einstæðingur.“

Þú hefur svarað öllum þessum spurningum neitandi, er eitthvað að þér þá?

„Já, sem blasir við öllum.“

Langar ekki til að hætta að vinna strax

En að öllu gamni slepptu, þú ert að leysa af er það ekki í héraðsdómi?

„Jújú, ég er að því“

Hvenær er það búið?

„Um áramótin.“

Og hvað tekur þá við? 

„Þá bara veit ég það ekki. Og ég er orðinn það fullorðinn að ég get svosem hætt.“

Langar þig það?

„Nei, mig langar það ekki. Ég held að ég væri einn af þeim sem myndu bara deyja fljótlega ef ég hætti alveg að vinna. Ég vil geta gert eitthvað, annars væri ég bara í sófanum og farlama á innan við ári,“ segir Brynjar.

En fyrir þá sem eru þarna úti að hlusta og vilja koma þér á óvart, hver er uppáhalds maturinn þinn?

„Það eru hrossabjúgur með uppstúf,“ segir hann.

Til hamingju með afmælið en ég veit samt ekki hvort að maður eins og þú ætti hreinlega að eiga afmæli.

„Nei, ég hef aldrei verið afmælisbarn. Ég hélt ekki upp á afmæli þegar ég var barn og mér finnst þau frekar óþörf,“ segir hann.