Vara við „Lafufu“

Labubu-bangsarnir komu fyrst á markað árið 2015 en náðu gífurlegum vinsældum í fyrra þegar kóresk poppstjarna sást með slíka dúkku á tösku sinni. Þá greip Labubu-æði um sig víða í Asíu og á þessu ári ferðaðist tískubylgjan til Bandaríkjanna og Evrópu.

Hvað skýrir vinsældirnar?

Ekki er hægt að segja fyrir vissu hvers vegna Labubu varð svo vinsælt en bangsarnir eru einnig umdeildir víða. Til dæmis hafa Rússar skoðað að banna þá þar sem ógnvekjandi útlit þeirra geti hrætt börn og yfirvöld í kúrdíska hluta Íraks hafa bannað sölu á þeim af sömu ástæðu.

Einn svona bangsi kostar um sex til sjö þúsund krónur í versluninni Pop Mart, sem er eini staðurinn þar sem þú getur verið viss um að þú sért að kaupa alvöru Labubu. Og í endursölu kosta vinsælustu og sjaldgæfustu bangsarnir hundruð þúsunda króna. Á Íslandi er í það minnsta ein verslun, Zolo og Co, sem verslar bangsa beint frá Pop Mart erlendis og selur alvöru Labubu.

Labubu eða Lafufu?

Þegar þú kaupir bangsa kemur hann í lokaðri pakkningu og því veit kaupandinn ekki hvernig dúkkan er á litinn fyrr en hann er búinn að versla. Einhverjir litir eru sjaldgæfari en aðrir og þeir því verðmætari fyrir vikið.

Það ber að hafa varann á þegar keyptur er Labubu þar sem á markaðinum eru fjöldi eftirlíkinga. Þær eru svo algengar að þær hafa eignast eigið nafn, Lafufu. Pakkningarnar eru mjög líkar og því erfitt að átta sig á að fölsuð útgáfa hafi verið keypt fyrr en eftir á. 

Fölsuðu útgáfurnar eru að mestu leyti verðlausar og alla jafna seldar á sama verði og ósvikinn bangsi. Því hafa margir setið eftir með sárt ennið eftir að hafa keypt verðlausa eftirlíkingu. 

Yfirvöld í Bandaríkjunum hafa varað við eftirlíkingunum þar sem þeir séu hættulegar börnum. Bangsarnir detti auðveldlega í sundur og börn komist þannig í smá íhluti sem þau gætu kafnað á.