Lang­þráður sigur með nýtt kerfi en Slot á­hyggju­fullur

Liverpool vann sannfærandi  sigur í gær eftir fjögur töp liðsins í röð. Slot gerði fimm breytingar frá tapi liðsins fyrir Manchester United um helgina, þar á meðal setti hann Egyptann Mohamed Salah á bekkinn.

Það er í fyrsta sinn á átta ára ferli Salah í Bítlaborginni sem hann situr á bekknum vegna slæms gengis innan vallar.

Það bar árangur. Slot breytti um kerfi og var það líkara 4-4-2 heldur en 4-2-3-1. Hugo Ekitiké og Alexander Isak voru saman frammi á meðan Florian Wirtz var á hægri kanti, með frelsi til að færa sig inn á miðju. Wirtz lagði upp eitt marka gærkvöldsins, fyrsta stoðsending hans síðan í Samfélagsskildinum í ágúst.

Curtis Jones og Dominik Szoboszlai voru tveir á miðjunni og þurftu að hlaupa umtalsvert í fjarveru meidds Ryans Gravenberch. Szoboszlai var að öðrum ólöstuðum besti leikmaður vallarins í gærkvöld.

Frankfurt-liðið féll saman í síðari hálfleik gegn Liverpool-liði sem lék á als oddi, en varhugavert væri að dæma Rauða herinn um of að leik gærkvöldsins þar sem mótstaðan var býsna lítil.

Gæti verið mikið högg fyrir Isak

Ekki er allt jákvætt eftir gærkvöldið. Alexander Isak átti fína spretti og fékk tvö ágætis færi en fór svo meiddur af velli í leikhléi.

„Hann komst nærri því að skora nokkrum sinnum, en þurfti að fara út af í hálfleik. Það er erfitt að finna jafnvægið með hann. Þegar hann kom fyrst hafði hann varla æft. Svo það þarf að taka þetta skref fyrir skref,“ segir Slot um Svíann sem á enn eftir að stimpla sig inn eftir metkaup Liverpool á Isak frá Newcastle á lokadegi félagsskiptagluggans.

Isak hafði verið í verkfalli hjá svarthvíta liðinu og æfði lítið í sumar.

„Okkur leið eins og hann gæti núna loks spilað tvo leiki í sömu vikunni. Svo þarf hann að fara af velli vegna þess að hann fékk tak í nárann. Ég vona að meiðslin séu ekki slæm því ef hann verður frá í einhverjar vikur myndi það aftra framgangi hans mjög,“ segir Slot.

Frimpong frá í einhverjar vikur

Isak er ekki sá eini sem fór af velli í gær. Jeremie Frimpong fór af velli um miðjan fyrri hálfleik vegna tognunar á læri. Frimpong er nýlega búinn að ná sér af samskonar meiðslum í læri og ljóst að fara þarf varlega með hann.

„Það eru gæði í þessu liði en það hjálpar ekki þegar Alisson, Giovanni Leoni frá og nú býst ég við að Jeremie verði frá í nokkrar vikur,“

„Hann jafnaði sig af tognun aftan í læri fyrir nokkrum vikum. Hann spilaði einn leik með landsliðinu, kom aftur hingað og því miður, meiddur aftur og þurfti að fara af velli,“ segir Slot.

Þeir Frimpong og Isak eru þeir leikmenn Liverpool sem hefur hvað erfiðlegast gengið að stimpla sig inn hjá liðinu eftir að hafa samið við það í sumar. Florian Wirtz hefur sætt töluverðri gagnrýni en hefur þó tekist betur að komast í takt við spilamennsku þess þrátt fyrir að mörk og stoðsendingar hafi látið á sér standa.

Liverpool á næst leik í ensku úrvalsdeildinni á laugardagskvöld. Liðið sækir Brentford heim til Lundúna klukkan 19:00 á laugardag. Þá mætir liðið Crystal Palace á Anfield í enska deildabikarnum á miðvikudag í næstu viku.