Besta byrjun Chicago Bulls síðan Jordan var í liðinu

Bulls hefur þar með unnið fimm fyrstu leiki sína á leiktíðinni og það hefur ekki gerst hjá félaginu síðan tímabilið 1996-97 þegar Michael Jordan var þar allt í öllu.

Þetta er líka aðeins í þriðja sinn í allri sögu félagsins sem Bulls byrjar tímabilið jafn vel.

„Okkur líður vel sem hópur með hvar við erum staddir núna, en það er langt í land,“ sagði leikstjórnandi Bulls, Josh Giddey, en hann var atkvæðamikill í 135-125 sigrinum á New York með 32 stig, 10 fráköst og níu stoðsendingar.

„Í hverjum leik eru mismunandi leikmenn að leggja sitt af mörkum og stíga upp. Við erum með marga leikmenn og sex, sjö leikmenn með yfir tíu stig að meðaltali. Það segir mikið um hversu djúpur hópurinn okkar er og þau áhrif sem við fáum frá öllum,“ sagði Giddey.

Í þessum fimm leikjum er Giddey með 22 stig, 8 stoðsendingar og 8,8 fráköst að meðaltali í leik ásamt því að vera með 48 prósent skotnýtingu (45 prósent úr þriggja stiga skotum).

„Þetta er staður þar sem mér finnst ég vera velkominn,“ sagði Giddey. „Ég elska að hafa þetta traust frá liðsfélögum mínum og þjálfurunum til að fara út á völlinn og láta til mín taka. Það er það sem við þurfum sem leikmenn. Þegar þú hefur trú frá öllum í kringum þig, ýtir það þér í rétta átt. Svo mér líður vel, okkur líður vel sem liði,“ sagði Giddey.

Fjórir af sigrum Chicago á þessu tímabili hafa verið gegn liðum sem spáð er í úrslitakeppnina í Austurdeildinni, þar á meðal New York, Orlando, Atlanta og Detroit. Og leikjadagskrá Bulls mun halda áfram að reyna á þá: Næsti leikur þeirra á sunnudag er einnig gegn Knicks í Madison Square Garden áður en þeir snúa aftur heim á þriðjudagskvöld til að mæta Sixers, sem töpuðu sínum fyrsta leik á tímabilinu á föstudag.