Grunaðir um hundruð milljóna króna þjófnað en ganga lausir

Þetta herma heimildir fréttastofu. Greint var frá því á Vísi í gær að lögregla hafi nú til rannsóknar fjársvik upp á um fjögur hundruð milljónir króna af íslensku bönkunum. Fimm eru í farbanni vegna málsins en einstaklingunum tókst að millifæra háar upphæðir af eigin reikningum án þess að inneign væri til staðar vegna galla hjá Reiknistofu bankanna.

Málið uppgötvaðist hjá Landsbankanum á föstudaginn en það rataði á borð lögreglunnar á höfuðborgarsvæðinu á laugardaginn. Agnes Ósk Marzellíusardóttir lögreglufulltrúi hjá miðlægri rannsóknardeild lögreglu sagði í kvöldfréttum Sýnar í gærkvöldi að enn væri margt á huldu vegna málsins. Það væri óvenjulegt og umfangsmikið.

„Þetta eru um fjögur hundruð milljónir en ég er ekki með það nákvæmlega hversu há þessi upphæð er, en hún er í formi bifreiða, þetta er í formi rafmynta og svo að sjálfsögðu bara reiðufé.“

Ekki sé útilokað á þessari stundu að jafnvel sé um enn hærri fjárhæðir að ræða. Agnes sagði töluverða vinnu framundan hjá lögreglu og mikilvægt hafi verið að kæra úrskurð héraðsdóms.