Eitt vin­sælasta leik­skáld Breta látið

Í tilkynngu frá aðstandendum hans segir að Stoppard hafi látist á heimili sínu í Dorset umvafinn fjölskyldu sinni og ástvinum.

Karl Bretakonungur og Camilla drottning hafa vottað fjölskyldu hans samúð sína, en í yfirlýsingu frá konungsfjölskyldunni segir að Stoppard hafi verið einn fremsti rithöfundur Bretlands.

Þá hefur Mick Jagger, forsprakki hljómsveitarinnar the Rolling Stones, einnig heiðrað minningu hans. Í færslu á samfélagsmiðlum sagði hann Stoppard sitt uppáhalds leikskáld.

Tom Stoppard fæddist í Tjekkóslóvakíu 1937 og bar þá nafnið Tomas Straussler. Hann flúði land sitt eftir hernám Þjóðverja undir forystu nasista, og settist að á Englandi.

Á fullorðinsárum frétti hann svo af því að ömmur hans og afar hefðu öll verið gyðingar og hefðu látist í útrýmingarbúðum nasista.

Hann starfaði sem blaðamaður í Bristol árið 1954, áður en hann gerðist leikhúsgagnrýnandi og síðar leikskáld.

Ferill hans tókst á loft á sjöunda áratug síðustu aldar, þegar leikrit hans Rosencrantz og Guildenstern eru dauðir, var frumsýnt á leikhúshátíð í Edinborg.

Tom var svo sleginn til riddara árið 1997 fyrir störf hans í þágu enskra bókmennta og leikhúss.