Pogba dreymir um að eiga dýrasta úlfalda heims

Í viðtali við breska ríkisútvarpið sagði þessi 32 ára gamli leikmaður frá því að hann væri orðinn hluthafi og sendiherra úlfaldakapphlaupsliðsins Al Haboob. Það er fyrsta atvinnuliðið sem hóf keppni í úlfaldakapphlaupi.

„Ég hef horft á nokkur úlfaldakapphlaup á YouTube og notað frítíma minn í að rannsaka og skilja tæknina og herkænskuna,“ sagði Paul Pogba.

Úlfaldakapphlaup eiga margt sameiginlegt með hestakappreiðum. Knapar ríða úlföldum um hringbraut og keppa sín á milli um að ljúka ákveðnum fjölda hringja á sem skemmstum tíma. Íþróttin er sérstaklega vinsæl í Miðausturlöndum.

„Að eiga dýrasta úlfalda heims einn daginn yrði falleg stund. Það er eitthvað skemmtilegt, eitthvað þýðingarmikið og eitthvað sem gleður mig. Kannski tekst okkur það einn daginn,“ segir Pogba.

Hinn 32 ára gamli Paul Pogba er að koma til baka eftir langt lyfjabann og fyrsti leikur hans fyrir franska félagið Mónakó á dögunum var hans fyrsti leikur í 811 daga.