Allra augu á Ís­landi og At­lants­hafinu

Þegar þetta er skrifað, um klukkan hálf þrjú, eru flestar af tíu mest vöktuðu flugferðunum á vefnum Flightradar, þar sem hægt er að fylgjast með flestum flugferðum heimsins, flugferðir sem snúa að Íslandi og/eða aðgerðum Bandaríkjamanna á Atlantshafinu í dag.

Nokkuð flökt hefur verið á vinsældum flugferðanna en þrjár af flugvélunum tíu eru sérstakar eftirlitsflugvélar sem eru mikið notaðar af bandarískum sérsveitum. Flugvélar þessar eru af gerðinni Pilatus U-28A Draco og er verið að fljúga þeim frá Wick í Bretlandi til Keflavíkur og verður þeim væntanlega flogið áfram til Bandaríkjanna.

Einnig er um að ræða herflugvélar og einkaþotur í eigu herafla Bandaríkjanna og hefur mikið verið fylgst með þeim á vef Flightradar í dag.

Um síðustu helgi og á mánudaginn fylgdust áhugamenn og sérfræðingar með flugferðum yfir Atlantshafið þar sem verið var að fljúga frá herstöð fyrir sérsveitarmenn í Bandaríkjunum til Bretlands.

Þessum flutningum fylgdu þyrlur og eftirlitsflugvélar og þótti það strax benda til þess að Bandaríkjamenn ætluðu sér að gera áhlaup um borð í skuggaskipið Marinera, sem kallaðist áður Bella 1.

Til stóð að stöðva skipið undan ströndum Venesúela í síðasta mánuði en það hefur verið beitt refsiaðgerðum vegna brota á viðskiptaþvingunum Bandaríkjanna gagnvart Íran og Rússlandi.

Bandarískir hermenn gerðu svo áhlaup um borð í skipið suður af Íslandi, innan íslenskrar efnahagslögsögu, í dag.

Mikill áhugi hefur verið á þessum aðgerðum í dag. Yfirmaður varnarmálaumfjöllunar hjá Economist lýsti eltingaleiknum við skuggaskipið í morgun sem „OJ Simpson eltingaleik Norður-Atlantshafsins.