Ljós­myndari pompaði á rassinn eftir öskur Kane

ÍA og Grindavík mættust í æsispennandi leik í síðustu umferð Bónus-deildarinnar þar sem Grindvíkingar höfðu þó að lokum betur.

Kómísk lokaandartök leiksins voru rædd í Körfuboltakvöldi eins og sjá má í spilaranum hér að neðan.

Styrmir Jónasson fékk þriggja stiga skot til að jafna metin fyrir ÍA, þegar örfáar sekúndur voru eftir af leiknum, og var Kane þá kominn af velli en stóð nálægt Styrmi. Bandaríkjamaðurinn sást þá kalla eitthvað, til að trufla Styrmi, og hvort sem það virkaði eða ekki þá fór skotið ekki ofan í og Grindavík fagnaði sigri.

„Ég er hundrað prósent á að þetta megi ekki en ég hef aldrei séð dæmt á þetta,“ sagði Ómar Örn Sævarsson í Körfuboltakvöldi.

Sérfræðingarnir gátu þó ekki staldrað lengi við öskur Kane því í sömu andrá varð ljósmyndari á leiknum fyrir því óláni að sæti hans hrökk hreinlega undan honum, svo að hann pompaði beint á rassinn. Þessu gátu menn ekki annað en hlegið af

„Þú hélst mögulega að þú myndir sleppa með þetta karlinn minn… niiii,“ mælti Stefán Árni Pálsson léttur til ljósmyndarans í góðri trú um að honum hefði nú ekki orðið meint af.