Niður­stöður sam­ræmdra prófa í vor verði opinberaðar

Í tilkynningu á vef Stjórnarráðsins segir að reglugerðin snúi einnig að að safni valkvæðra matstækja Matsferils. Samræmda námsmatið, Matsferill, sé miðlægt heildstætt safn matstækja í formi staðlaðra stöðu- og framvinduprófa, skimunarprófa og annarra matstækja sem kennarar og skólar geti nýtt sér í kennslu og við mat á stöðu og framvindu hvers barns í námi, jafnt og þétt yfir skólagönguna.

Markmið Matsferils séu að:

• veita upplýsingar um stöðu og framfarir nemenda,
• meta árangur miðað við ákveðin hæfniviðmið aðalnámskrár,
• styðja við skipulag kennslu og snemmtækan stuðning,
• veita nemendum, foreldrum, skólum og menntayfirvöldum upplýsingar um námsárangur og námsframvindu nemenda,
• veita samanburðarhæfar upplýsingar um stöðu grunnskóla, sveitarfélaga og skólakerfis í heild til stefnumótunar í námi og kennslu.

Á að leiða til umbóta

Miðstöð menntunar og skólaþjónustu annist framkvæmd Matsferils, vinnslu og varðveislu upplýsinga í samræmi við lög um persónuvernd og vinnslu persónuupplýsinga. Matið sé lagt fyrir með rafrænum hætti. 

„Niðurstöður samræmda námsmatsins skulu nýttar við skipulag náms og kennslu nemenda. Grunnskólar skulu fylgja eftir niðurstöðunum þannig að slíkt mat leiði til umbóta í skólastarfi og ber að gera skólanefndum sveitarfélaga árlega grein fyrir niðurstöðum og umbótum. Miðstöð menntunar og skólaþjónustu skal jafnframt nýta niðurstöður til að styðja við skólastarf.“

Hvetja fólk til að veita endurgjöf

Niðurstöður skyldubundinna prófa verði gerðar aðgengilegar og birtar opinberlega, til dæmis staða hvers skóla miðað við landsmeðaltal í skólum yfir ákveðnum nemendafjölda.

„Mennta- og barnamálaráðuneytið hvetur foreldra, kennara, skólastjórnendur, nemendur, aðra hagaðila og alla þá sem láta menntun barna sig varða til að veita endurgjöf,“ segir í tilkynningu.