Ráð­herra segir ríkis­valdið gefa í með fram­kvæmdir

Í kvöldfréttum Sýnar var farið á árlegt útboðsþing Samtaka iðnaðarins. Þar hittast verktakar landsins og helstu verkkaupar til að fá yfirlit yfir verklegar framkvæmdir og helstu útboð ársins. Og það virðist ætla að verða nóg að gera.

„Já, það lítur allt út fyrir það að það verði býsna mikill kraftur í framkvæmdum á þessu ári. Og sem er vel, því að það veitir svo sannarlega ekki af að efla innviði landsins,“ segir Sigurður Hannesson, framkvæmdastjóri Samtaka iðnaðarins.

Á útboðsþinginu var mönnum tíðrætt um innviðaskuld. Fjármálaráðherrann segir að ríkisvaldið ætli að mæta henni af krafti.

„Það hefur aldrei nokkurn tíma verið eins mikið af verkefnum kynnt, fjárfestingarverkefnum, heldur en akkúrat á þessu ári. Kannski stærstu viðbæturnar eru að það er loksins verið að rjúfa kyrrstöðuna í orkuöflun en líka fjárfestingar í vegakerfinu,“ segir Daði Már Kristófersson, fjármála- og efnahagsráðherra.

Umfangsmestu útboð ársins eru boðuð hjá Landsvirkjun við Hvammsvirkjun, en einnig vindorkuver við Vaðöldu og stækkun Sigöldu og Þeistareykja.

„Við ætluðum að fara út með fleiri útboð í fyrra en þau áform gengu ekki eftir. En við förum bara aftur brött inn í þetta ár og allar áætlanir okkar núna eru á þann veg að þetta eigi að ganga eftir. Þannig að í heildina þá erum við að áætla útboð fyrir um 70 milljarða króna þetta árið,“ segir Ásbjörg Kristinsdóttir, framkvæmdastjóri framkvæmdasviðs Landsvirkjunar.

Mestu framkvæmdir innan ársins verða hjá Vegagerðinni.

„Framkvæmdir í vegakerfinu eru upp á 34 milljarða króna, þar af 17,5 í endurbætur og viðhald, og um 17 milljarða tæpa í nýjar nýbyggingarframkvæmdir,“ segir Jón Heiðar Gestsson, forstöðumaður framkvæmdadeildar Vegagerðarinnar.

Hjá Vegagerðinni segir hann framundan að bjóða út um tuttugu verk um land allt.

„Við horfum bara fram á bjarta tíð núna og munum bjóða út á fullu núna á næstu dögum og vikum,“ segir Jón Heiðar.

Samtök iðnaðarins benda á að stór verk séu að klárast hjá ríkinu, eins og nýi Landspítalinn.

„Núna er rétti tíminn fyrir hið opinbera, ríki og sveitarfélög, að fara að huga að næstu stóru uppbyggingarverkefnum og fjárfestingum.“

-Hvar myndirðu vilja sjá þær framkvæmdir?

„Við þurfum að sjá það í vegakerfinu og við þurfum að sjá það í orkuöflun,“ svarar Sigurður Hannesson.

„Við höfum auðvitað áhyggjur af því að þessi stóri mikilvægi geiri, mannvirkjageirinn, upplifi enn eina sveifluna og það er okkur mjög dýrt að sveiflast svona upp og niður. Við missum mannauð, við missum þekkingu, við missum fyrirtæki. Það er okkar ætlun, og það sést nú alveg greinilega á þessu þingi, að koma til móts við einkamarkaðinn með því að ríkið gefi verulega í,“ segir Daði Már Kristófersson, fjármála- og efnahagsráðherra, í frétt Sýnar sem sjá má hér: