„Geggjað að fá að vera í þessari stöðu og hitta úr þessum skotum“

„Þetta er gríðarlega mikilvægt að ná þessu“ sagði Veigar Páll Alexandersson sáttur eftir sigurinn.

„Dwayne [Lautier-Ogunleye] sagði eftir leik að þetta hafi verið fjögurra stiga leikur. Þeir unnu okkur með einu síðast og við náðum að vinna þá með fimm stigum svo það var gríðarlega mikilvægt og geggjað að ná þessum sigri “

Frábær sigur hjá Njarðvíkingum sem hafa verið hættulega nálægt botnbaráttunni upp á síðkastið en hvað var það sem skildi á milli?

„Við hreyfum boltann vel. Mér finnst við svo bara spila sem lið, mér hefur fundist það vanta svolítið undanfarið og bara að ná að klára leikina. Það hefur líka svolítið vesen í vetur að klára leikina og við gerðum það núna“

Þetta var mjög kaflaskiptur leikur þar sem Njarðvík leiddi með tólf stigum í hálfleik en voru svo sex stigum undir í upphafi fjórða leikhluta. Það mátti heyra á Veigari Páli að þessi sigur hafi gefið þeim mikið.

„Þetta er búið að vera svolítið erfitt en þetta er svo mikilvægt fyrir okkur að ná þessum sigri og bara byggja ofan á þetta“

Leikurinn var alveg í járnum í fjórða leikhluta og það vantaði eitthvað sérstakt til þess að loka leiknum fyrir annað hvort liðið þá steig Veigar Páll upp og skoraði níu stig í röð fyrir Njarðvikinga gegn þremur frá Álftanesi.

„Það er bara geggjað að fá að vera í þessari stöðu og hitta úr þessum skotum. Það er bara geggjuð tilfinning“

Rúnar Ingi Erlingsson kallaði Veigar Pál eftir leik „Njarðvíkuræðina“ sem sigldi þessu heim.

„Það er gamall brandari frá síðasta þorrablóti. Hann kallar mig þetta stundum“ sagði brosandi Veigar Páll Alexandersson að lokum.