Rektor Há­skólans á Bif­röst segir af sér

Margrét greinir frá þessu í viðtali í Kastljósi á Rúv. Hún hefur gegnt stöðunni í fimm ár.

„Fyrir þennan Kastljós-þátt þá sendi ég bréf á stjórn skólans þar sem ég bað um lausn úr starfi,“ sagði Margrét.

„Ég hef fylgst með opinberri aftöku minni í fjölmiðlum frá 14. janúar og þetta hefur verið að malla innra með mér. Sérstaklega þegar ég sá að umræðan var farin að hafa áhrif á nemendur gerði ég það.“

Vantrauststillagan samþykkt

Um miðjan janúar var greint frá því að félagar í Félagi akademískra starfsmanna við Háskólann á Bifröst (FAB) hefðu lýst yfir vantrausti á stjórnsýslu Margrétar. Margrét auk deildarstjóra og rannsóknarstjóra við skólann höfðu notað gervigreindarmállíkanið Claude til að meta réttmæti höfundarstöðu á vísindagreinum hjá þremur akademískum starfsmönnum.

Sjá nánar: Deilur í Háskólanum á Bifröst

Í Kastljósi sagði Margrét að hún hefði fengið rannsóknarstjórann og deildarstjórann til að beita mannlegri dómgreind, sem þau gerðu, og síðan hefði verið fundað með siðanefndinni sem taldi tilefni til að taka málin fyrir. Það komi fram í úrskurðinum.

FAB setti einnig út á að Margrét hafi beðið siðanefndina um að taka málið til skoðunar án þess að láta starfsmennina þrjá vita. Siðanefndin hafnaði þeirri beiðni.

Margrét segir að það sé ekkert til í þeirri fullyrðingu. Hún hafi kallað starfsmennina fyrir nefnd og tjáð þeim að málið ætti að fara fyrir siðanefnd. Hins vegar í bréfi Margrétar til siðanefndarinnar, sem að fréttastofa hefur undir höndum, kemur annað fram.

„Til að tryggja rannsóknarhagsmuni, fer undirrituð þess á leit við nefndina að gera rektor viðvart þegar nefndin hefur aflað sér allra gagna utan Háskólans á Bifröst er hún telur nauðsynleg til að leggja mat á neðangreind mál. Ef nefndin metur það svo, að áframhaldandi rannsóknar sé þörf, mun rektur gera hlutaðeigendum viðvart um aðild þeirra að þessu máli,“ segir í bréfinu.

Líkt og kom fram hafnaði siðanefnd beiðni hennar.

„Það var niðurstaða siðanefndar að í ljósi þess að við málsmeðferð skuli nefndin gæta meginreglna stjórnsýslulaga um upplýsingaöflun, meðalhóf og andmælarétt gangi þetta verklag ekki upp,“ segir í svari nefndarinnar.

Tekið er fram að meðlimir hennar skilji hugsunina sem liggji að baki vegna rannsóknarhagsmuna en telur þá ekki nægjanlega tli að ganga gegn meginreglunni um að allir sem koma að málinu eigi að vita að mál þeirra sé til meðferðar.

Nýtur nafnleyndar

Seinna meir greindi Margrét frá því að athugunin hófst eftir að hún fékk ábendingu frá aðila sem nýtur nafnleyndar. Málsaðilar hafa sent stjórn Bifrastar bréf þar sem þess er krafist að nafnleynd í málinu verði aflétt, annars verði skoðað að leita til dómstóla eða leggja málið fyrir Umboðsmann Alþingis. Vísað er til stjórnsýslulaga þessu til stuðnings.

Þau nýttu síðan niðurstöðurnar til að kæra starfsmennina þrjá til siðanefndar skólans. Tveir starfsmannanna hafa stigið fram, þau Hanna Kristín Skaftadóttir og Ragnar Már Vilhjálmsson, sem eru bæði lektorar við skólann. Þriðja starfsmanninum var sagt upp í sömu viku og málið fór fyrir siðanefnd í nóvember 2025. 

Stjórnendur skólans sögðu honum hafa verið sagt upp fyrir ótengdar sakir og hann sagður hafa brotið trúnað með því að kenna við annan háskóla.

Starfsmennirnir þrír voru allir hreinsaðir af öllum sökum.

Nemendur tjáðu sig

Starfsmennirnir hafa töluvert tjáð sig um málið og í byrjun febrúar sögðu þeir starfsumhverfið þrúgandi og að réttlætiskennd fólks væri misboðið. Stjórn háskólans harmaði þá stöðu sem var komin upp innan skólans og sagðist vilja leita leiða til að koma samtali innan skólans í uppbyggilegan farveg.

Stjórnin sagðist hins vegar treysta Margréti til að stýra daglegum rekstri skólans.

Stuðningur stjórnarinnar var meðal þess sem Selma Klara Gunnarsdóttir, hagsmunafulltrúi Nemendafélags Háskólans á Bifröst, setti út á í skoðanagrein sem birtist á Vísi um helgina. Hún sagði vantraustsyfirlýsingu á hendur rektors veki upp spurningar um hvort stjórnin forgangsraði hagsmunum einstaklings ofar velferð stofnunarinnar.

Að auki benti Selma Klara á að nemendur íhuguðu að segja sig úr námi við skólann og leita í aðra skóla til að stunda meistaranám að grunnnáminu loknu. 

Í dag sagði Selma Klara að nokkrir nemendur hefðu verið beittir þrýstingi og beðnir um að endurskoða afstöðu sína eða ekki taka afstöðu í málinu.

„Það er ekkert eðlilegt við það að fá símtal frá stjórnendum og upplifa að það sé verið að misnota traust þeirra. Nemendur skólans og starfsfólk á að geta tjáð sig óhindrað,“ segir hún.

„Það hefur enginn nemandi verið þvingaður,“ sagði Margrét nú í kvöld.

Fréttin hefur verið uppfærð.