Tryggvi og fé­lagar fara taplausir á­fram

Bilbao á titil að verja frá síðasta tímabili í Evrópubikarnum og mætti PAOK einmitt í úrslitaleiknum í fyrra. Bilbao hafði ekki tapað leik í riðlakeppni fyrir lokaumferðina í dag, en PAOK hafði aðeins tapað einum leik, á útivelli gegn Bilbao.

Risarnir tveir í þessum riðli tókust hart á í dag en heimamenn virtust ætla að hafa sigurinn, með tíu stiga forskot í upphafi fjórða leikhluta.

Gestirnir frá Bilbao börðust hins vegar til baka og Tryggvi skoraði stigin tvö sem komu þeim 85-84 yfir, en það var í fyrsta sinn síðan í fyrri hálfleik sem Bilbao leiddi.

PAOK náði að jafna aftur en Justin Jaworski kláraði leikinn á vítalínunni.

Tryggvi lauk leik með 13 stig, 7 fráköst, 1 stoðsendingu, 1 stolinn og 2 varða bolta.

Bilbao Basket heldur áfram í 32 liða úrslit Evrópubikarsins en óvíst er hverjum liðið mætir þar.