Í hefndar­hug til Ís­lands eftir „fíaskóið“ á EM

Aftonbladet, einn stærsti íþróttamiðill Svíþjóðar, segir að um sé að ræða fyrstu tvo leiki Svía „eftir fíaskóið á EM“.

Þar steinlágu Svíar gegn Íslendingum, 35-27, en hefðu samt komist í undanúrslit ef þeir hefðu svo ekki gert 32-32 jafntefli við Ungverjaland.

Svíar enduðu svo á að mæta Portúgal í leik um 5. sæti og töpuðu þar, 36-35, áður en Ísland lék svo um bronsið en endaði í 4. sæti.

Lið Íslands og Svíþjóðar mætast hér á landi 19. og 21. mars en ekki hefur verið staðfest nákvæmlega hvar þeir leikir fara fram.

Sextán árum yngri markvörður

Michael Apelgren, landsliðsþjálfari Svía, hefur nú valið leikmenn sína í hópinn og þrátt fyrir vonbrigðin á EM gerir hann nánast engar breytingar. Eini munurinn er sá að markvörðurinn Andreas Palicka er hættur í landsliðinu, 39 ára, og í hans stað kemur hinn 23 ára gamli Marko Roganovic.

Marko er eldri bróðir Nikola Roganovic sem stimplaði sig vel inn með Svíum á EM.

„Hann [Marko Roganovic] er spennandi markvörður og það er mikilvægt fyrir okkur að taka inn unga leikmenn en gera það með réttum hætti svo að þeir verði ekki of margir á sama tíma. Hann hefur staðið sig vel í Danmörku [með Bjerringbro-Silkeborg] síðan hann fór úr sænsku deildinni en það er annað og meira að hjálpa okkur að berjast um verðlaun á stórmóti. Við viljum sjá hann í þessu umhverfi,“ sagði Apelgren við Aftonbladet.

Leikurinn við Ísland mestu vonbrigðin

Landsliðsþjálfarinn lítur á leikina við Ísland sem tækifæri til að hefna fyrir ófarirnar á EM.

„Við höfum harma að hefna. Leikurinn við Ísland er sá sem olli okkur mestum vonbrigðum á Evrópumótinu. Við náðum engu fram í þeim leik og þetta skapaði óvissu fyrir leikinn við Ungverjaland og svo vorum við allt í einu úr leik á mótinu.

Þessi leikur undirstrikaði vonbrigðin okkar með varnarleikinn á EM. Við höfum mikið verk að vinna þar og það verður gott að vinna í því gegn Íslandi,“ sagði Apelgren.