Fjarbúð á enda og eltir nú drauminn

Birta skrifaði undir tveggja ára samning við Genoa og skoraði í frum­raun sinni með liðinu og er að venjast lífinu í at­vinnu­mennskunni.

„Þetta er alveg mikil breyting,“ segir Birta í sam­tali við íþrótta­deild. „En á sama tíma finnst mér þetta mjög gaman. Maður er að taka skrefið. Fara í betra um­hverfi. Spila á móti betri leik­mönnum. Í betri deild. Það er líka mjög lær­dóms­ríkt og góð reynsla fyrir mig. Að fá að taka þetta næsta skref og halda áfram að þróast sem leik­maður.“ 

„Maður var búinn að vinna Ís­lands­meistara­titilinn, bikar­meistara­titilinn, komast áfram í Evrópu- og Meistara­deildinni. Endaði síðasta tíma­bil á að vera valinn besti leik­maður Bestu deildarinnar. Mér fannst þetta, á þessum tíma­punkti, vera gott skref fyrir mig til að halda áfram að þróast sem leik­maður.“

Og á Ítalíu hittir hún fyrir kærasta sinn, ís­lenska lands­liðs­manninn Mikael Egil Ellerts­son sem er einnig leik­maður Genoa.

„Við höfum verið saman mjög lengi en höfum aldrei búið saman. Við höfum alltaf verið að spila fót­bolta í sitt hvoru landinu. Nú er mjög gaman að búa saman og fá að spila bæði fót­bolta í þessu um­hverfi, á þessu gæða­stigi og á sama staðnum. Ég get ekki kvartað.“

Valin í fyrsta sinn

Birta var á dögunum valin í ís­lenska lands­liðið í fyrsta sinn á ferlinum og það fyrir risastórt verk­efni í undan­keppni HM gegn ríkjandi heims­meisturum Spánar og ríkjandi Evrópu­meisturum Eng­lands.

„Það var mjög góð til­finning að vita að ég hafi verið valin þó svo að ég hafi ekkert endi­lega verið að búast við því. En það fylgir þessu bara mjög góð til­finning og er bara mikill heiður. Ég er alveg mjög spennt fyrir því að hitta hópinn og fá að vera hluti af þessu á móti þessum and­stæðingum líka.

Maður æfði auka­lega þegar að maður var yngri. Allt fyrir svona stundir. Að vera verð­launuð með því að vera valin í lands­liðið, fá tækifærið til þess að halda er­lendis og spila þar. Jú klár­lega. Það er geggjað að hugsa til baka eftir alla vinnuna sem maður hefur lagt í þetta. Maður hefur lagt svo mikið á sig fyrir þessar stóru stundir og ég lít stolt til baka.“