Segir á­hyggju­efni að leik­reglur séu virtar að vettugi

„Það sem að slær mig kannski fyrst og fremst er bara hversu hraklega málflutningurinn var settur saman að réttlæta þessar aðgerðir, þar sem er auðvitað farið á svig við stofnsáttmála Sameinuðu þjóðanna og alþjóðalög almennt, þannig það heldur áfram að valda vonbrigðum frá Washington, alveg eins og í Venesúela,“ segir Erlingur.

Þrátt fyrir að fáir fæstir myndu sakna íranskra stjórnvalda, þá setur Erlingur spurningarmerki við það hvernig Ísraelar og Bandaríkjamenn hafa staðið að aðgerðum. „Írönsk stjórnvöld mun enginn syrgja ef að þau falla frá og þessi fjöldamorð á mótmælendum undanfarnar vikur eru auðvitað skelfileg. En það er samt áhyggjuefni ef að leikreglur alþjóðakerfisins eru virtar að vettugi og það er hægt að grípa til hernaðaraðgerða af litlu tilefni. Þannig ég hef töluverðar áhyggjur af því,“ segir Erlingur.

Einkum í ljósi þess að samningaviðræður um kjarnorkuáætlun hafi verið í gangi. „Maður spyr sig svolítið, voru þær komnar í strand þannig að það var ástæða til þess að grípa til valdbeitingar eða hvað býr hérna á bakvið?“

Erfitt sé að spá í spilin um það hversu lengi þetta ástand muni vara og hver áhrifin verða. „Við sáum í Venesúela að þar náðist árangur að vissu leyti mjög hratt þó að eftirleikurinn sé kannski dálítið flóknari. Ég gef mér að í Íran verði erfiðara að fella stjórnina með loftárásum einum saman og Trump kallar þarna eftir því að almenningur rísi upp og horfist þá í augu við vald ríkisstjórnarinnar á nýjan leik. Þannig það er mjög erfitt að ráða í það. En ég gef mér að stjórnvöld séu töluvert seigari í Íran heldur en þau voru í Venesúela þannig það verði aðeins meiri viðnámsþróttur, en það er mjög erfitt að spá um,“ segir Erlingur.