Í lands­liðið því lítill ættingi er á leiðinni

Íslenski hópurinn ferðaðist til Litáens í gærmorgun eftir sigurinn frækna gegn Litáen í Laugardalshöll á föstudaginn. Leikurinn við heimamenn er á morgun klukkan 16:30 að íslenskum tíma.

Tveir leikmenn hafa helst úr lestinni síðan á föstudaginn því Haukur Helgi Pálsson verður ekki með vegna meiðsla og þá fékk Kári Jónsson leyfi þar sem hann er að verða pabbi á næstu dögum.

Í þeirra stað koma tveir leikmenn Álftaness, þeir Sigurður Pétursson og Ragnar Nathanaelsson.

Þess má til gamans geta að þeir Sigurður og Kári eru bræðrasynir en feður þeirra eru körfuboltaþjálfararnir Pétur og Jón Arnar Ingvarssynir. Sigurður kemur því inn í landsliðið á sama tíma og hann er um það bil að eignast nýjan og náskyldan ættingja.