Pepsi víkur fyrir Coca-Cola í vélum Icelandair

Atli Ísleifsson skrifar 3. mars 2026 07:17

Bogi Nils Bogason, forstjóri Icelandair, og Anna Regína Björnsdóttir, forstjóri Coca-Cola á Íslandi, við undirritun samningsins.

Icelandair og Coca-Cola á Íslandi hafa undirritað samstarfssamning sem felur í sér að drykkjarvörumerki Coca-Cola á Íslandi verða aftur seld um borð í vélum félagsins.

Í tilkynningu segir að frá og með morgundeginum verði Coca-Cola, Coca-Cola Zero Sugar, Fanta Zero, Sprite Zero og Icelandic Glacial kolsýrt vatn í boði í öllum áætlunarflugum Icelandair.

Fram kemur að um sé að ræða tímamótasamstarf en vörur Coca-Cola voru síðast í boði um borð hjá Icelandair árið 2008. Formleg undirritun fór fram í höfuðstöðvum Icelandair, en drykkir Ölgerðarinnar hafa verið í boði um borð í vélum Icelandair síðustu ár.

Haft er eftir Önnu Regínu Björnsdóttur, forstjóra Coca-Cola á Íslandi, að félagið sé afar stolt að hefja þetta samstarf við Icelandair og að vörumerki Coca-Cola verði aftur í boði um borð. „Icelandair er eitt sterkasta og virtasta vörumerki landsins og það er okkur heiður að fá að vera hluti af þeirri upplifun sem félagið skapar fyrir farþega sína á hverjum degi.“

Þá er haft eftir Boga Nils Bogasyni, forstjóra Icelandair, að Icelandair hlakki til samstarfsins um gosdrykki um borð í flugvélum félagsins. „Samstarfið er niðurstaða útboðs og verða gosdrykkir frá Coca-Cola fáanlegir um borð hjá okkur nú strax í byrjun mars.“

Icelandair Fréttir af flugi Neytendur