Elliði lofar því að flytja ekki aftur til Eyja

Elliði var hress þegar Vísir heyrði í honum nú fyrir stundu. Listi Sjálfstæðisflokksins var kynntur í gær og er mjög líkur þeim sem var fyrir síðustu sveitarstjórnarkosningar. Elliði var ráðinn af meirihlutanum í Ölfusi til að gegna stöðu bæjarstjóra en hann segir ekkert ákveðið þar um. Hann segir listann glæsilegan og hann hafi verið kynntur á fjölmennasta fundi Sjálfstæðisflokksins þar í byggð í sögunni.

Styður lista Sjálfstæðismanna af heilum hug

„Ég styð þennan lista og hvern einasta einstakling sem á honum er eindregið. Og mun gefa hverja örðu af frítíma til að hjálpa þeim í kosningum,“ segir Elliði.

Ekki hefur þó verið gengið frá því að Elliði verði bæjarstjóraefni Sjálfstæðisflokksins. Það er einfaldlega ófrágengið, að sögn hans.

„Ég er ekki einu sinni farinn að ræða þetta við framboðslistann. Við eigum þetta samtal fund á morgun. Þegar maður er búinn að vera í þessu í tuttugu ár veit maður að lífið er stutt og tækifærin mörg. Það er ekkert víst að áherslur fari saman. Þetta er mikil skuldbinding og við viljum taka þetta samtal. Við tökum engu sem gefnu. Mínar höfuðáherslur eru, ég hef aldrei rekið sveitarfélag í mínus og ég vil að þær áherslur verði eftir sem áður uppi.“

Þannig mun þetta liggja fyrir á morgun. 

Taugaveiklun gagnvart Elliða og Eyjum

Víkur þá sögunni að Eyjum og væringum þar milli fylkinga Sjálfstæðismanna þar. Þrálátur og hávær orðrómur er uppi um að þar vinni Elliði bak við tjöldin. Fyrir liggur að þar munu takast á um efsta sætið Eyþór Harðarson, sem er nú efsti maður á lista Sjálfstæðismanna, og svo Trausti Hjaltason. Eyþór hefur talað fyrir sameiningu Sjálfstæðismanna við H-listann. 

Trausti er hins vegar talinn í vinfengi við Elliða Vignisson, bæjarstjóra í Ölfusi sem um árabil var bæjarstjóri í Vestmannaeyjum, sem er ekki enn hættur að skipta sér af bæjarmálapólitíkinni í Eyjum. Er þetta sannleikanum samkvæmt, ert þú hugsanlegt bæjarstjóraefni í Eyjum?

„Það eina sem ég held að ég geti sagt með fullri vissu er að ég er ekki að flytja til Vestmannaeyja, það er hægt að taka það úr myndinni,“ segir Elliði sem veit ekki hvort hann á að hlæja eða gráta við spurningunni.

„Við höldum heimili þar en einhvern tíma hlýtur þessari taugaveiklun gagnvart mér og bæjarmálapóltíkinni í Eyjum að ljúka. Ég er ekki viss um að það hafi áður gerst að einstaklingur hafi áður þurft að gefa út það loforð að hann ætli ekki að flytja eitthvað en það getur vel verið að sú staða sé komin upp gagnvart Vestmannaeyjum og mér,“ segir Elliði Vignisson.