Myrti kærustuna og spurði svo ChatGPT hvað hann ætti að gera

Saksóknarar lögðu fram hryllileg sönnunargögn til stuðnings ákæru um morð af yfirlögðu ráði á hendur varnarmanninum í forréttarhaldi á mánudag í Chattanooga í Tennessee-fylki.

Darron Lee, sem var valinn í fyrstu umferð NFL-nýliðavalsins af New York Jets, leitaði ráða hjá ChatGPT-gervigreindarforritinu um hvernig hann gæti komist upp með morðið á kærustu sinni, sem hann er sagður hafa barið og stungið til bana í síðasta mánuði, að sögn saksóknara.

Fannst á blóðugu heimili þeirra

Kærasta hans, Gabriella Carvalho Perpétuo, fannst látin af lögreglu á gólfinu á blóðugu heimili þeirra í Tennessee.

Það sem kom mest á óvart voru samskipti Lee og ChatGPT um hvernig ætti að búa til fjarvistarsönnun vegna áverka Perpétuo.

Sjónvarpsstöðin WCTV í Chattanooga greindi frá því að Lee hefði sent spjallþjarkinum örvæntingarfull skilaboð skömmu áður en Perpétuo fannst látin á gólfi heimilis sem var þakið blóði og fullt af áfengisflöskum.

Ég veit ekki hvað ég á að gera núna

„Ég veit ekki hvað ég á að gera núna. Unnusta mín tók eitt af sínum brjálæðisköstum aftur og nú er hún illa farin. Ég var að vakna og hún er með tvö bólgin augu (ég gerði ekkert, hún gerði þetta sjálf). Hún stakk sig eða skar sig í augað. Ég veit það ekki en hún er ekki að vakna eða svara mér, hvað á ég að gera?“ spurði Lee ChatGPT samkvæmt upplýsingum saksóknara.

Átti að hafa dottið í sturtunni

Lee er sagður hafa sagt lögreglumönnum að Perpétuo þjáðist af drómasýki og hefði dottið í sturtunni. Samkvæmt vitnisburði rannsóknarlögreglumannsins Brian Lockhart bentu sönnunargögn um allt heimilið hins vegar til þess að áverkarnir væru augljóslega ekki af völdum sjálfsáverka eða slyss.

„Það var blóð upp stigann, á handriðinu var blóð, á veggjunum var blóð, á gólfinu í stofunni var blóð,“ sagði Lockhart og bætti við: „Það var blóð í nánast öllum herbergjum nema einu.“