Ís­land.is ekki full­nægjandi sem þjónustu­vefur

Þetta er meðal þess sem kemur fram í tilkynningu frá samtökunum. Stafrænum upplýsinga- og þjónustumiðstöðvum er ætlað að gera einstaklingum og þjónustuveitendum mögulegt að veita þjónustu í öðrum EES-ríkjum.

Þá er tilgangur þeirra einnig að gera þjónustuveitendum kleift að ljúka allri opinberri skráningu og viðurkenningu á starfsréttindum með rafrænum hætti á einni vefsíðu. Að mati ESA, sem lesa má í heild sinni hér, hefur ekki tekist nógu vel til að koma slíkri þjónustumiðstöð á fót hér á landi.

Málið fyrst opnað árið 2020

Meðal þess sem er sett út á island.is, en hann er sagður vera þjónustumiðstöð Íslands samkvæmt tilkynningunni, er að „þar sé ekki að finna nauðsynlegar upplýsingar fyrir þjónustuaðila frá öðrum EES-ríkjum.“

Málið var opnað að frumkvæði ESA árið 2020 en formlegt áminningarbréf var sent Íslandi í mars 2023. Þar segir:

„Með því að hafa ekki komið á fót vefsíðu sem þjónaði sem miðlæg stafræn upplýsinga- og þjónustumiðstöð hefði Ísland ekki uppfyllt skyldur sínar samkvæmt EES-samningnum.“

Hafa tvo mánuði

Þrátt fyrir að álitið setji að mestu út á íslensku þjónustumiðstöðina er einnig tekið þar fram að „íslenska ríkið hafi náð ákveðnum framförum við að koma íslensku þjónustumiðstöðinni á laggirnar.“

Það vanti hins vegar enn mikilvægar upplýsingar á vefinn og að uppbygging island.is sé með þeim hætti að erlendum þjónustuveitendum sé ekki ljóst að vefurinn sé íslenska þjónustumiðstöðin. Þetta segir einnig í tilkynningunni.

Álitið er annað skrefið í formlegu brotaferli ESA. Nú hafa íslensk stjórnvöld tvo mánuði til að „koma sínum sjónarmiðum á framfæri,“ segir í tilkynningunni en að því loknu getur ESA ákveðið hvort vísa eigi málinu til EFTA-dómstólsins.