Frábært að sleppa við austantjaldið

Valur Páll Eiríksson skrifar 19. mars 2026 15:03

Einar Þorsteinn Ólafsson fagnar góðri æfingaviku og stórleikjum hér heima. Vísir/Bjarni

„Ég held þetta sé sérstaklega ljúft núna að ná heilli viku hérna heima á Íslandi. Það er ógeðslega mikil snilld,“ segir Einar Þorsteinn Ólafsson, landsliðsmaður í handbolta. Íslenska liðið hefur nýtt tímann vel til æfinga í vikunni og mikil spenna er fyrir leik við Svíþjóð í kvöld.

Ísland náði besta árangri liðsins í 16 ár þegar liðið lenti í fjórða sæti á EM karla í handbolta í janúar. Einar segir hafa tekið tíma að venjast daglegu lífi eftir þá keyrslu en fagnar því að koma heim og hitta hópinn aftur.

Klippa: Fínt að sleppa við að fara austur fyrir tjaldið

„Það tók alveg smá tíma að ná sér niður eftir þá spennu. Einmitt þegar maður var kominn í smá rútínu er maður núna mættur aftur. En ég ætla ekki að kvarta, það er alltaf frábært að vera hérna,“

„Ég held það séu allir rosalega spenntir og ánægðir að fá að taka toppleiki á Íslandi sem gerist ekki oft. Þetta er kannski smá sérstakt verkefni núna. Ég er persónulega ótrúlega spenntur,“ segir Einar Þorsteinn.

Ísland mætir Svíþjóð í kvöld og aftur á laugardag. Það hefur ekki gerst oft undanfarin ár að Ísland fái heimaleiki í landsliðsgluggum og heyra má á landsliðsmönnum að þeir fagna því mjög.

„Að fá Svíana, það er geggjað að þeir hafi nennt að koma. Svo verður geggjað að fá að spila heima með Íslendinga í stúkunni og geggjuð stemning,“ segir Einar.

Það sé sérlega gott að spila báða leikina hér heima og ná góðri æfingaviku fyrir leikina. Vegna góðs árangurs í janúar sleppur Ísland við forkeppni fyrir HM á næsta ári og fær þess í stað æfingaleiki við sterkar þjóðir.

„Eftir svona mót vill maður halda rytmanum og stiginu, að spila á móti svona góðu liði. Að við séum ekki að fara í þessa grínleiki og geggjað að vera ekki að fara í forkeppnina og þurfa að fara eitthvað til Austur-Evrópu. Það er betra að vera bara hér, vera allir saman og tengjast enn meira,“ segir Einar.

Viðtalið má sjá í spilaranum.

Ísland og Svíþjóð mætast klukkan 19:30 í kvöld. Leikurinn fer fram á Hlíðarenda og verður lýst í beinni textalýsingu hér á Vísi.

Landslið karla í handbolta