Upp­selt á alla leiki Ís­lands en HSÍ verður með hóp­ferðir

Enn situr í fersku minni þegar þúsundir Íslendinga sátu svekktir eftir hér á landi með engan miða á úrslitahelgi EM í janúar. 

Einhverjir eru kannski farnir að hugsa um að skella sér á næsta stórmót, HM í janúar, en þar eru allir miðar í almennri sölu orðnir uppseldir.

„Það eru ekki nema nokkrir dagar síðan við fengum að vita hvar við myndum spila. Við komum til með að spila riðilinn í Magdeburg, förum svo yfir til Hannover í milliriðla og þaðan til Köln, ef allt gengur vel. 

Miðasala hófst fyrir mörgum mánuðum, og eins ótrúlegt og það er þá er búið að selja þúsundir af miðum. Þýska þjóðin virðist hafa keypt ótrúlega mikið magn af miðum án þess að vita hvaða lið eru að fara að spila í höllinni,“ sagði Jón Halldórsson, formaður HSÍ.

HSÍ náði hins vegar að redda nokkur hundruð miðum og verður með hópferðir til Þýskalands.

„Nú erum við með þessa miða og þessa dagana erum við bara að setjast niður til að skipuleggja. Þetta verða pakkaferðir sem verða seldar út og við komum til með að birta þær bara á næstu tveimur vikum.“

Á bilinu 400 til 1500 miðar 

Þannig að eini möguleikinn á því að fá miða, ef þú ert ekki nú þegar búinn að tryggja þá, er að bóka sig í hópferð á vegum HSÍ. En hversu margir miðar verða seldir þar?

„Það er ekkert rosalega mikið sko. Við erum með tæplega 400 miða í fyrstu leikina en það er misjafnt miðamagnið eftir leikjum. Þetta er svona frá 400 og upp í 1300, 1400, 1500 miða sem við erum með á þessa leiki… Við erum komin með samtals eitthvað á bilinu 4500-5000 miða sem kosta okkur örugglega tæpar fjörutíu milljónir. Við erum að vinna dag og nótt við að finna þessar 40 milljónir svo við getum keypt miða og selt þá áfram.“

Hversu margir fara svo raunverulega í sölu?

Stór hluti af þessu miðum mun síðan fara til fjölskyldna leikmanna, starfsfólks HSÍ og styrktaraðila sambandsins. Hversu margir miðar fara þá raunverulega í sölu?

„Það kemur í ljós,“ svaraði Jón.

Fjallað var um miðamálin í Sportpakka Sýnar í gærkvöldi. Innslagið má sjá í spilaranum að ofan. Hér fyrir neðan má finna lengri útgáfu af viðtalinu við Jón Halldórsson, formann HSÍ.