Var eitrað fyrir leik­mönnum Sporting? „Þetta var ein­hver holræsislykt“

Þetta var fyrsti leikur liðanna í úrslitakeppninni og ljóst að það átti að beita öllum brögðum. Skömmu eftir að leikmenn Sporting komu inn í búningsklefann voru allir sendir út úr klefanum enda lyktin allt annað en eðlileg þar inni.

„Þjálfarinn og einn leikmaður fara að finna mikla vanlíðan. Þeir fá svima og í raun þurfa bara að leggjast á gólfið. Eftir það var okkur bannað að fara inn í klefann og svo verður mikil atburðarrás eftir það,“ segir Orri Freyr Þorkelsson, leikmaður Sporting, við íþróttadeild.

Þetta var algjör viðbjóður

„Þetta var einhver svona holræsislykt og loftið þarna inni mjög þungt. Þetta var algjör viðbjóður. Maður hefur farið inn í klefa með vondri lykt en þetta var aðeins meira en það. Að fara út var eins og að fá súrefnisgrímu á andlitið.“

Þrátt fyrir mótlætið náði Sporting að vinna leikinn sem var seinkað vegna uppákomunnar. Forráðamenn Sporting eru eðlilega allt annað en sáttir og þeir segja þessa hegðun glæpsamlega og krefjast aðgerða frá yfirvöldum enda urðu menn veikir.

„Svo urðu fleiri leikmenn sem voru að finna fyrir hálsinum og sumir urðu rauðir í augunum og þurftu augndropa. Það er eins og það hafi eitthvað verið þarna í loftinu en ég veit ekki hvað það er. Það voru tveir sem misstu af leiknum og þurftu aðstoð frá sjúkraliðum.“