Tuchel ekki reiður út í leik­menn

Noni Madueke, Declan Rice, Bukayo Saka, John Stones og Adam Wharton hafa allir dregið sig úr hópnum eftir leik Englands við Úrúgvæ á föstudag. Þeir verða þar af leiðandi ekki með í leiknum gegn Japan á morgun.

Þetta er síðasti landsleikjaglugginn áður en Tuchel þarf að velja HM-hópinn í lok maí.

„Þetta er veruleikinn sem við þurfum að glíma við á þessum tíma. Það eru leikmenn að taka þátt í mörgum keppnum og eru undir miklu álagi. Það eru leikmenn í hópnum sem hafa spilað enn meira en síðasta tímabil. Það er áhyggjuefni,“ sagði Tuchel og hefur fullan skilning á því að það þurfi að passa upp á heilsu leikmanna.

„Þessir leikmenn eiga skilið smá frí frá fótbolta. Ekki síst vegna andlegrar heilsu. Þetta er svekkjandi en ég get ekki kennt leikmönnunum um. Ég er ekki reiður út í þá.“