Gæsluvarðhaldskröfu yfir Írisi hafnað

Þetta herma heimildir fréttastofu en fátítt er að kröfu um gæsluvarðhald sé hafnað á þessu stigi mála. Um fyrstu varðhaldskröfu var að ræða.

Í gær var greint frá því að birst hefði dánartilkynning Sölva Guðmundarsonar þrátt fyrir að hann væri svo sannarlega lifandi. Í færslu á samfélagsmiðlum sagði hann Írisi Helgu Jónatansdóttur bera ábyrgð á uppátækinu.

„Kæru ættingjar og vinir, þið sem hafið verið að senda skilaboð og athuga hvort ég sé í alvöru dáinn, þá er svo alls ekki og er ég sprelllifandi,“ segir Sölvi í færslunni en hann og Íris voru að sögn Sölva í árslöngu sambandi sem lauk í byrjun mars 2024.

Áreitið hafi byrjað nokkrum vikum eftir sambandsslit þeirra og síðan þá hafi hún meðal annars sent skilaboð á dóttur Sölva og reynt að skera dekkin á bílnum hans. Hann leitaði fyrst til lögreglu vegna hennar árið 2024 en sjö menn hafa kært hana fyrir umsáturseinelti.

Jenný Kristín Valberg, teymisstýra Bjarkarhlíðar, sagði í samtali við fréttastofu Vísis í gær að umsáturseineltismál væru alltof algeng hér á landi og erfitt væri að bregðast við þeim.

„Það hefur frekar verið þannig á Íslandi að það hefur verið þótt íþyngjandi fyrir gerendur að sæta nálgunarbanni frekar en að þetta sé nýtt til að tryggja öryggi þolenda. Það eru alltof fá dæmi um að þetta sé nýtt. Það þarf að líta á þessi mál þannig að þetta séu íþyngjandi brot sem er verið að beita þolendur, oft yfir langan tíma. Þetta grefur undan öryggi þolenda og hefur áhrif á þeirra persónulega líf.“

Birting dánartilkynningar sé enn eitt dæmið um hve langt eltihrellar eru tilbúnir að ganga til að ná athygli þolenda. Hún sagði jafnframt að hún þekkti ekki mál sem er sambærilegt þessu en að það væru alltaf að koma nýjar birtingarmyndir ofbeldis og að þetta væri eitt dæmi um það.

Ekki hefur verið tekin ákvörðun um hvort úrskurðurinn verði kærður til Landsréttar samkvæmt tilkynningu frá Margréti Kristínu Pálsdóttur, lögreglustjóra á Suðurnesjum.

Fréttin var uppfærð klukkan 11:35.