„Takk fyrir mig Kefla­vík, þetta var æðis­leg sería“

„Ég er bara svo ánægður með það hvernig við spiluðum“ sagði Frank Aron Booker sem átti stórkostlegan leik fyrir Val í kvöld og endaði með 29 stig.

„Við gátum alveg frákastað betur en við náðum að koma saman og við hittum úr skotum loksins og náðum að verjast Remy og Egor og þetta var bara algjör barátta, takk fyrir mig Keflavík“

Leikurinn var mjög jafn lengst af en Valsmenn náðu að berja aðeins frá sér í fjórða leikhluta.

„Já mér fannst þeir vera miklu aggressívari í sóknarfráköstunum og þeir náðu helvíti mörgum boltum en við náðum að stíga aðeins betur út og ná þessum boltum“

Frank Aron Booker átti möguleg sinn besta leik á ferlinum en hann skoraði 29 stig í kvöld og var gjörsamlega frábær fyrir Val.

„Það getur alveg verið en ef ég er hreinskilinn er mér drullusama hvað ég skora mikið. Mig langar bara að sjá aðra gera það gott og ég reyni mitt besta. Það eina sem skiptir máli er að við vinnum“

Frank Aron Booker fann fyrir ákveðinni ábyrgð í leiknum í kvöld.

„Mér leið bara eins og ég tók það sem þeir gáfu mér. Skotin sem að ég fékk opin, ég tók þau bara og ef ég sá galopið sniðskot þá tók ég það. Ég er bara hérna að skemmta mér og ég vildi að pabbi væri hérna en svona er þetta en hann horfir niður og er mjög ánægður“

Frank Aron Booker missti föður sinn fyrr á tímabilinu og hefur þetta verið erfitt tímabil fyrir hann persónulega.

„Þetta er búið að vera drullu erfitt og ég get alveg verið smá hreinskilinn að ég er ennþá smá dauður að innann ennþá en þetta er partur af lífinu og ég þarf bara einhvern veginn að lifa með þessu en hann veit að ég elska hann mjög mikið og hann elskaði mig út af lífinu eins og þið sáuð fyrir tveim árum síðan“

„Ég veit að hann er algjör Valsari og hann er mjög ánægður núna“

Frábær sería gegn Keflavík á enda en næst tekur við deildarmeistarar Grindavíkur.

„Mér líður eins og þessi sería er búin að gefa okkur smá töffaraskap til þess að koma inn í næstu seríu sem verður á móti Grindavík sem er hörku lið“

„Takk fyrir mig Keflavík, þetta var æðisleg sería“ sagði Frank Aron Booker.