Flugi seinkað vegna for­falla í á­höfn

Er þetta þriðja áætlunarferð Icelandair frá 5. maí sem er ýmist aflýst eða seinkað vegna vöntunar á áhafnarmeðlum þegar forföll koma upp. Fyrst var flugi til Kaupmannahafnar aflýst vegna mönnunarvanda, síðan flugi til Seattle vegna sömu ástæðu og nú í dag seinkaði flugi til Brussel vegna vanda við að manna áhöfn.

Fréttastofu hafa ekki borist svör frá forsvarsmönnum Icelandair vegna flugsins til Brussel í morgun. Icelandair á í kjaraviðræðum við Félag íslenskra atvinnuflugmanna hjá embætti ríkissáttasemjara. 

Jón Þór Þorvaldsson, formaður félagsins, segir í samtali við Ríkisútvarpið að engin tengsl séu á milli kjaradeilu FÍA og Icelandair og þeirra seinkana eða aflýsinga sem hafa orðið síðustu daga eða í dag.

Bogi Nils Bogason, forstjóri Icelandair, hefur sagt að það væru gríðarleg vonbrigði ef starfsfólk félagsins væri í óformlegum verkfallsaðgerðum, en líkt og áður segir hefur formaður Félags íslenskra atvinnuflugmanna þvertekið fyrir að svo sé.