Messan um stóra dóminn: „Þetta er bara rétt“

Í uppbótartíma í leik West Ham og Arsenal á Lundúnaleikvanginum á sunnudaginn fengu Hamrarnir hornspyrnu. Boltinn barst til Callums Wilson sem þrumaði honum inn og hélt að hann hefði jafnað í 1-1.

Arsenal-menn mótmæltu strax harðlega og við tók reikistefna, hvort markið yrði dæmt gilt eða ekki. Eftir að hafa farið út að hliðarlínu til að horfa á atvikið dæmdi Chris Kavanagh markið á endanum af vegna brots Pablos á David Raya, markverði Arsenal.

Aron Jóhannsson telur að Kavanagh hafi tekið rétta ákvörðun þegar hann dæmdi markið af.

„Jájá, maður er búinn að sjá þetta þegar þetta er svona hægt. Að sama skapi eru allir að toga og ýta en hann heldur ofarlega í höndina á Raya og ef hann hefði ekki gert það hefði Raya haldið uppteknum hætti, gripið boltann og þetta hefði ekki verið neitt vesen,“ sagði Aron.

„Það hefði verið gaman að fá smá alvöru spennu í þetta en þetta er hárrétt. Vel gert hjá dómaranum.“

Ásgerður Stefanía Baldursdóttir tók undir með Aroni.

„Þetta er bara rétt. En þetta augljósa er svo löngu fallið um sjálft sig í VAR-inu. Hann dæmir mark en þetta er rétt. Ég veit ekki hvort við sjáum þetta í Liverpool-leiknum að það er verið að ýta og toga endalaust en síðan eru svona augnablik sem er dæmt á. En þetta er bara rétt, því miður, eins og Aron sagði, því það hefði verið gaman að fá aðeins meira spennandi leiki í síðustu tveimur umferðunum,“ sagði Adda.

Ríkharð Óskar Guðnason benti á hvernig Declan Rice hélt Konstantinos Mavropanos í umræddri hornspyrnu.

„Þú getur tekið svona atvik í hverju einasta horni. Það er alltaf verið að toga og svo eru þessir markmenn líka heilagir. Að því sögðu grípur hann [Pablo] bara í höndina á honum [Raya] og er að toga í hana. Ef hann hefði gripið í hana og sleppt strax væri þetta kannski smá vafaatriði fyrir mér. En hann grípur í höndina á honum, heldur í hann og sleppir ekki,“ sagði Aron.

Eftir sigurinn á Lundúnaleikvanginum er Arsenal með fimm stiga forskot á toppi ensku úrvalsdeildarinnar. Manchester City getur minnkað forskotið niður í tvö stig með sigri á Crystal Palace annað kvöld.

Innslagið úr Messunni má sjá í spilaranum hér fyrir ofan.