Heiðurshallarþjálfarinn Rick Adel­man látinn

Adelman er einnig faðir David Adelman, núverandi þjálfara Denver Nuggets. Hann var 79 ára að aldri. Dánarorsök var ekki tilkynnt að svo stöddu.

Rick Adelman vann 1042 leiki sem NBA-þjálfari, sem er tíundi besti árangur í sögu deildarinnar. Aðeins fjórir aðrir þjálfarar – Pat Riley, Gregg Popovich, Jerry Sloan og George Karl – þjálfuðu fleiri leiki og höfðu betra sigurhlutfall en Adelman, sem kom Portland Trail Blazers tvisvar í úrslitakeppni NBA-deildarinnar og var einnig aðalþjálfari í Sacramento, Houston, Minnesota og Golden State.

„Adelmans verður ekki aðeins minnst sem þjálfara og leikmanns, heldur einnig sem læriföður svo margra í körfuboltasamfélaginu,“ segir í yfirlýsingu frá samtökum þjálfara, sem heiðruðu Adelman með Chuck Daly-verðlaununum fyrir ævistarf sitt árið 2023.

„Þjálfaraferill Ricks Adelman í NBA-deildinni hefur einkennst af nýsköpun, heilindum og afburðum,“ sagði Rick Carlisle, þjálfari Indiana, þegar NBCA veitti honum þessi verðlaun fyrir þremur árum. „Lið hans léku alltaf eftir styrkleikum sínum og Rick fann alltaf lúmskar leiðir til að endurnýja NBA-körfuboltann til að hjálpa leikmönnum sínum að blómstra. Hans rólega og tilgerðarlausa eðli leynir áhrifum hans sem eins af bestu NBA-þjálfurum allra tíma.“

Adam Silver, framkvæmdastjóri NBA-deildarinnar, kallaði Adelman „frábæran herkænskusmið og kennara íþróttarinnar, og enn betri manneskju“ í yfirlýsingu til heiðurs þjálfaranum.

Kings-liðið sagði í minningarorðum sínum að Adelmans „verði minnst fyrir hvernig hann veitti þeim sem voru í kringum hann innblástur – með auðmýkt, heilindum, góðvild og óbilandi trú á krafti liðsheildarinnar.“