Leggja bönn á á­fengis­neyslu vegna hitabylgjunnar

Frönsk stjórnvöld hafa gripið til þess ráðs að banna áfengisneyslu utandyra en landið fagnar í dag tónlistinni á hinni árlegu Fête de la Musique. Hefð er fyrir því á deginum að fólk komi saman og flytji tónlist undir berum himni. Er það gert til að minnka álag á neyðarþjónustu í því ástandi sem hitabylgjan hefur skapað.

Í höfuðborg landsins, París, er spáð því að hiti muni ná fjörutíu gráðum á hverjum degi fram á fimmtudag. Rúmlega tíu milljónir manna búa á stórborgarsvæðinu.

Yfirvöld á Ítalíu hafa einnig þurft að berjast við hitabylgjuna. Víða í stórborgum gilda rauðar veðurviðvaranir og varað er við því að hiti muni fara yfir fjörutíu stig í stórum hluta landsins á morgun. Hitabylgjan hefur magnast upp síðustu daga og er búist við að hún nái hámarki á morgun, mánudag.

Í Þýskalandi spáir hæst þrjátíu og sjö gráðum á morgun en á Spáni mun hiti ná fjörutíu gráðum samkvæmt spám, þar á meðal í höfuðborg landsins, Madríd. Fréttastofan AP greinir frá því að hitabylgjan hafi þegar valdið auknum fjölda drukknana í Evrópu þar sem fólk leiti út í vötn og ár í von um að kæla sig niður.

Nýlega sýndi rannsókn Alþjóðaheilbrigðismálastofnunarinnar fram á að rúmlega tvö hundruð þúsund manns hafi látið lífið vegna hita í Evrópu á síðustu fjórum árum.

Búist er við að hitabylgjum sem þessari muni fara fjölgandi eftir því sem meðalhiti jarðar hækkar og loftslag breytist.