„Stundum þarf bara að vinna að al­vöru fyrir þessu“

„Við byrjum þetta vel og skorum en svo fara menn aðeins í smá kósí og gera ekki vinnuna eins og við eigum að gera“ sagði Aron Elís Þrándarson leikmaður Víkings en hann skoraði tvö mörk fyrir sína menn í kvöld.

„Þá koma KA-menn bara inn í þetta og komast yfir. Eftir það tók smá tíma að komast í gang en mér fannst seinustu þrjátíu við alveg vera með þá og lágum á þeim vel og unnum þetta að lokum“

Víkingar komust yfir á 5. mínútu leiksins en KA skoraði næstu tvö mörk og leiddu í hálfleik.

„Menn voru ekki sáttir með fyrri hálfleikinn. Við erum á heimavelli og þetta var ekki boðleg frammistaða í fyrri hálfleik“

„Við skerptum aðeins á hlutunum og það var enginn örvænting eða neitt svoleiðis, það voru enn 45 mín eftir þannig við tókum því rólega og fórum aðeins yfir hlutina og kláruðum þetta svo í seinni“

Víkingur þjarmaði að marki KA áður en stíflan loks brast og Víkingar fóru að lokum með sigur en þeir þurftu að hafa vel fyrir honum.

„Þetta bara gerir mikið fyrir okkur. Við vissum það alveg að yfir heila deild þá ferðu ekkert í gegnum alla leiki 3-0 yfir og bara í kósíheitum“

„Stundum þarf bara að vinna að alvöru fyrir þessu og við gerðum það í dag. Mér fannst við vera þolinmóðir og enginn örvænting þó að þetta hafi komið seint“

Þessi sigur gefur Víkingum mikið fyrir framhaldið en þeir eru á leið í Evrópuverkefni á næstu dögum.

„Þetta er risastórt fyrir okkur að fá einn svona sigur. Þetta er aðeins öðruvísi sigur en við höfum verið að vinna. Við höfum meira verið svona að sigla sigrunum og við sóttum þennan aðeins og það er bara stórt“

Það má kalla þetta meistarasigur hjá Víkingum í kvöld.

„Menn mega bara kalla þetta það sem þeir vilja. Nú er það bara Evrópa og gríðarlega mikilvægt að fara með sigur inn í það verkefni“ sagði Aron Elís Þrándarson.