„Verið að þreyta okkur þangað til við gefumst upp“

Brynjar Karl tilkynnti um ákvörðunina á Facebook-síðu sinni í gærkvöldi og lýsti þar áralangri baráttu félagsins við Reykjavíkurborg. Nú sé rekstrarsamningur borgarinnar um starfsemi Aþenu í Austurbergi í Breiðholti að renna út og engin svör fáist um framhaldið.

„Borgin er bara að draga þetta og draga þetta og draga þetta, að gefa okkur svör. En ég held að ástæðan fyrir því að við fáum ekki svarið sé að það yrði svo gróft. Þannig að það er bara verið að þreyta okkur þangað til við gefumst upp, og það er bara dálítið komið að því núna.

Við erum ábyrgir aðilar sem ætlum að gefa þessari úrvalsdeild tækifæri til að fylla í skarðið. Í staðinn fyrir að draga þau inn í óvissuna og þurfa svo að skilja eftir skarð í úrvalsdeildinni. Við berum meiri virðingu fyrir kvennakörfunni en það.“

Í lok maímánaðar, fyrir um fimm vikum síðan, tók nýr meirihluti við taumunum í borgarstjórn Reykjavíkur. Brynjar var því spurður hvernig samskipti við nýju borgarstjórnina hefðu verið.

„Ég er orðinn leiður á að tala um samskipti, hvernig þau eru og allt þetta. Ég vil bara tala um kjarna málsins: Það er enginn samningur við Aþenu. Ég kann ákaflega vel við mjög marga sem við höfum talað við, það hafa verið mjög margir góðir fundir, það brosa allir á fundum, það lofa allir öllu fögru á öllum fundum, en staðan er bara þessi. Samningurinn er til, það hefði ekki verið neitt mál að virkja hann, sérstaklega í ljósi þess að við sendum út neyðarkall fyrir fimm vikum síðan.“

Í ljósi þessarar ákvörðunar, að draga meistaraflokk Aþenu úr keppni í Bónus deild kvenna, hvað ber framtíðin í skauti sér fyrir félagið?

„Þetta er fyrsta skrefið. Og þetta er mjög þungt. Það er í sjálfu sér mjög alvarlegt að lið sé dregið úr úrvalsdeild en það sem er enn alvarlegra er það að stelpurnar í liðinu eru þær sem bera uppi þjálfunina. Þetta eru stelpurnar sem byrjuðu þetta, þær eru orðnar mjög færar og þær hafa unnið sér inn mikið traust hjá krökkunum. Að það skuli vera sett í uppnám, það er lang alvarlegasta dæmið.“

Brynjar Karl ræddi niðurlög Aþenu í Sportpakka Sýnar í gærkvöld. Innslagið má sjá í spilaranum að ofan.