Kefl­víkingar semja við Litáa og Stólarnir fá Banda­ríkja­mann

Körfuknattleiksdeild Keflavíkur hefur gert samning við litháíska framherjann Robertas Jonaitis,

Robertas er 196 sentimetra framherji sem spilaði í háskólaboltanum í Bandaríkjunum og spilaði síðasta tímabil með Kordall Steelers í Lúxemborg. Jonaitis var með 22,9 stig og 10,2 fráköst að meðaltali í Lúxemborg þar sem hann hitti úr 27 prósent þriggja stiga skota sinna og 78 prósent vítanna.

Körfuknattleiksdeild Tindastóls hefur samið við bandaríska leikmanninn Jalen Adaway um að leika með liðinu á komandi tímabili. Jalen er 196 sentimetra bakvörður/vængmaður með feril að baki úr NCAA, NBA G League og atvinnudeildum beggja vegna Atlantshafsins. Hann lék háskólabolta með Miami University og St. Bonaventure, þar sem hann var valinn í First Team All-Atlantic 10 árið 2022, og hefur síðan sýnt styrk sinn sem atvinnumaður í krefjandi deildum erlendis. Meðal annars varð hann meistari í Slóvakíu með Patrioti Levice.

„Adaway er leikmaður sem passar vel inn í Stólana: líkamlega sterkur, árásargjarn, duglegur í fráköstum og tilbúinn að leggja sig allan fram báðum megin á vellinum. Hann getur skorað, sótt af krafti að körfunni og komið með orku sem við vitum að stuðningsmenn Tindastóls kunna að meta,“ segir í frétt um hann á miðlum Stólanna.