Littler rústaði metum og varði titilinn

World Matchplay fór fram um helgina og þar vann Littler yfirburðasigur. Hann varði titilinn og er aðeins fjórði pílarinn sem nær því.

Þetta 19 ára gamla píluundur pakkaði Gerwyn Price saman í úrslitaleiknum, 18-9.

Það sem er kannski enn stærra er að Littler var með meðalskor á mótinu upp á 111,04 og rústaði meti Phil Taylor sem var 106,31. Það met var sett árið 2010.

Í úrslitaleiknum var Littler með 111,53 í meðalskor sem var líka met. Hann tók það met líka af Phil Taylor sem var með 111,23 í meðalskor í úrslitaleiknum 2013 gegn Adrian Lewis.

„Þetta er búin að vera klikkuð vika. Ein besta píluvika lífs míns. En þetta var svo sannarlega ekki auðvelt,“ sagði kampakátur Littler.