Var launahæstur í sögunni í tvo daga

Robinson skrifaði undir þriggja ára samning við Atlanta Falcons sem unnið hefur verið að í allt sumar á þriðjudaginn var. Hann hefur verið á meðal allra bestu hlaupara deildarinnar frá því að hann var tekinn í nýliðavalinu fyrir þremur árum.

Aðeins Saquon Barkley, í Philadelphia Eagles, og Derrick Henry, í Baltimore Ravens, hafa hlaupið meira á árunum þremur síðan Robinson kom í deildina.

Samningurinn var þá sá hæsti í sögunni fyrir leikmann í hlauparastöðunni og tryggir hann Robinson 22,25 milljónir dala árlega. Það nemur 2,76 milljörðum króna.

Annar hlaupari, Jahmyr Gibbs, hefur vakið mikla athygli síðustu misseri. Hann gerði tveimur dögum síðar nýjan samning við Detroit Lions sem nær til ársins 2030.

Hann varð þar tveimur dögum síðar sá launahæsti, en hann mun fá 250 þúsund dölum meira, tæplega 42 milljónum króna, en Robinson á ári, eða 22,5 milljónir dala í árslaun.

Met Robinsons lifði því aðeins í tvo daga, en ljóst er að margra augu verða á þeim tveimur á komandi leiktíð í NFL-deildinni sem fer af stað eftir mánuð.