Með um­töluð sím­töl og skila­boð á sínu borði

Helga Þórisdóttir, forstjóri Persónuverndar, segir stofnunina ætla að leyfa fleiri ábendingum að berast áður en ákveðið verður hvort og þá hvernig málin verða tekin til frekari skoðunar.

„Nokkrum dögum fyrir kosningarnar fóru okkur að berast ábendingar um óumbeðin fjarskipti og við fundum okkur knúin til þess að setja ábendingu um það á vefsíðuna okkar,“ segir Helga.

Helga segir Persónuvernd jafnframt hafa unnið með öðrum aðilum innan stjórnkerfisins að því að upplýsa almenning um hvað væri heimilt og hvað ekki.

„Svo koma kosningarnar og í framhaldi af því erum við að fá  fleiri ábendingar og einhverjar kvartanir eru að skila sér til okkar.“

Næstum allar ábendingar um Áfram Ísland

Helga óskaði eftir leiðréttingu á fréttinni sem birtist hér í gær  þar sem haft var eftir henni að kvartanir fyrir og eftir þjóðaratkvæðagreiðsluna vörðuðu fleiri en einn aðila. 

Helga segir í samtali við fréttastofu að hún hafi átt við þau sem hafa sent Persónuvernd ábendingar og kvartanir, Það sé hins vegar nánast bara einn aðili sem ábendingar og kvartanir snúi að eða Áfram Ísland- hreyfingunni sem barðist fyrir neii í þjóðaratkvæðagreiðslunni um liðna helgi. Ein ábending hafi snúið að Já til að sjá. 

„Það er næstum aðeins gagnvart Áfram Ísland- hreyfingunni, segir Helga.“

Persónuvernd hefur ekki gefið upp hvaða einstaklinga, samtök eða aðila ábendingarnar varða.

Símtöl, SMS og tölvupóstar án samþykkis

Helga segir ábendingarnar fyrst og fremst lúta að óumbeðnum fjarskiptum.

„Þetta er spurning um það hvort fólk sé að fá símtöl, SMS og tölvupósta án þess að hafa óskað eftir því, án þess að hafa samþykkt það og slíkt.“

Persónuvernd birti á vef sínum 27. ágúst ábendingu vegna vinnslu persónuupplýsinga í aðdraganda þjóðaratkvæðagreiðslunnar.

Helga segir meðal annars mikilvægt að fólki sé ljóst hver standi að baki slíkum samskiptum og að einstaklingar eigi kost á að andmæla þeim.

„Það þarf að vera upplýst hvaðan þessi símtöl eru að koma og varðveittur kostur á andmælum.“

Ákvörðun á næstu dögum

Persónuvernd hyggst nú meta umfang þeirra ábendinga og kvartana sem berast áður en ákveðið verður hvort tilefni sé til frekari aðgerða.

„Ég hugsa að það verði bara tekin ákvörðun um það hratt í næstu viku.“

Helga segir að þeir sem vilji koma ábendingum á framfæri við Persónuvernd geti sent þær á netfangið postur@personuvernd.is.

Fréttin hefur verið uppfærð