Góður gangur í við­ræðum Arsenal og Arteta

Það er BBC sem greinir frá og segir viðræður félagsins við Spánverjann ganga vel. Heimildir miðilsins herma að viðræðurnar hafi þokast hratt áfram upp á síðkastið og eru forráðamenn Arsenal fullvissir um að Arteta muni skrifa undir nýjan samning.

Arteta hefur sjálfur lýst yfir vilja sínum til að halda áfram verkefni sínu í Norður-Lundúnum.

„Minn vilji er að vera hér þar sem að ég er mjög ánægður. Bæði ég og félagið erum á sama stað hvað það varðar. Þess vegna hefur þetta þokast áfram í náttúrulegu ferli,“ sagði Arteta á blaðamannafundi um samningsstöðuna á dögunum.

Búist er við því að Arteta muni með nýja samningnum verða einn launahæsti knattspyrnustjóri í heimi.

Arteta er nú þegar sá stjóri af núverandi knattspyrnustjórum í ensku úrvalsdeildinni sem hefur verið lengst í starfi.

Arsenal varð Englandsmeistari undir hans stjórn í fyrsta skipti á síðasta tímabili og ætlar sér að reyna að verja titilinn og sækja fram í Meistaradeildinni þar sem liðið tapaði í vítaspyrnukeppni í úrslitaleik gegn PSG á síðasta tímabili.

Arteta tók við stjórnartaumunum hjá Arsenal í desember árið 2019 og núgildandi samningur hans rennur út næsta sumar.

Undir hans stjórn hefur Arsenal orðið Englandsmeistari sem og enskur bikarmeistari. Þá hefur liðið í þrígang unnið Samfélagsskjöldinn.