Arteta mjög hissa á um­mælum Jesus

Jesus gekk í raðir Barcelona eftir fjögurra ára veru hjá Arsenal og lét það í ljós í viðtali skömmu eftir komuna til Spánar að hann væri mjög ósáttur við það hvernig komið var fram við hann hjá Arsenal á lokadögum hans hjá félaginu.

Eftir undirbúningstímabilið var Jesus látinn æfa einn, merki um að hann væri ekki í plönum Arteta fyrir tímabilið.

„Enginn sagði mér neitt,“ sagði Jesus meðal annars í viðtali við SportyTV. „Ég gerði mitt besta til að verða tilbúinn í að spila aftur á hæsta gæðastigi.“

Ummæli Jesus voru borin undir Arteta á blaðamannafundi í morgun.

„Ég er mjög hissa á ummælum hans, í fullri hreinskilni sagt,“ sagði Arteta. „Sér í lagi vegna þess að ég átti einn á einn samtal við hann í búningsklefanum.

Þar töluðum við um þakklæti í garð hvors annars. Ég veit ekki. Þetta er í lagi. Ég get skilið að þegar þú þarft að færa einhverjum vondar fréttir eða fréttir sem hann á ekki von á þá gæti viðkomandi brugðist svona við.“

Svar Arteta í fullri lengd má sjá í spilaranum hér ofar í fréttinni. Arsenal heimsækir Sunderland í ensku úrvalsdeildinni annað kvöld.