„Það þarf að hreinsa að­eins loftið“

Matvælastofnun og Umhverfis- og orkustofnun veittu félaginu Kaldvík AS rekstrar- og starfsleyfi til fiskeldis í Seyðisfirði á föstudaginn.

Formaður Félags um vernd Seyðisfjarðar hefur sagt bæjarbúa á móti sjókvíaeldi og verður leyfið kært. Kaldvík hefur nú leyfi til að ala tíu þúsund tonn af laxi í Seyðisfirði á þremur eldissvæðum.

Ívar Karl Hafliðason, formaður heimastjórnar Seyðisfjarðar og bæjarfulltrúi Sjálfstæðisflokksins í Múlaþingi, segir það ekki svo að allir íbúar Seyðisfjarðar séu ósáttir við þessa niðurstöðu.

„Það er kannski erfitt að tala fyrir hönd allra íbúa en það er alveg ljóst að það er hópur sem telur þetta ekki gott fyrir Seyðisfjörð og er mjög hávær. Við fáum þetta verkefni, þessa ákvörðun, í fangið frá ríkinu og okkar verkefni verður dálítið að ná utan um þetta, hvernig menn vilja síðan stíga næstu skref.“

Markmiðið sé að ná eins mikilli sátt í bæjarfélaginu og mögulegt er. Hann segir það að einhverju leyti gott að fá niðurstöðu í málið eftir öll þessi ár.

„Þetta eru lok á mjög löngu leyfisveitingarferli sem er búið að vera í gangi í tólf ár og maður hefur alveg fundið svona skoðanir í samfélaginu dálítið sveiflast fram og til baka. Þetta kom okkur líka svolítið á óvart, að leyfið skyldi vera veitt. Við fengum engan fyrirvara á því. Það eru bara þrír dagar síðan leyfið var veitt svo menn eru aðeins að reyna að ná utan um það hvað það þýðir.“

Það komi á óvart að starfsleyfi sé gefið út áður en boðaðar breytingar á lögum um lagareldi gangi í gegn.

„Það voru ákveðin vonbrigði að það skyldi ekki klárast á síðasta þingi af því að ég held að við séum öll sammála um að við viljum hafa skýran ramma og kröfur á þessa atvinnugrein. Ég held að það sé enginn á móti því. Það þarf aðeins að uppfæra þessi gömlu lög.“

Hann segir að aðeins tíminn muni leiða í ljós hvort að leyfisveitingin reynist jákvæð eða neikvæð fyrir Seyðisfjörð.

„Hvort þetta verði til framtíðar jákvætt eða neikvætt, það er eitthvað sem menn geta kannski sett puttan í loftið og giskað. Ég bara vona það. Þetta er verkefni sem við fáum í fangið og við þurfum sem heimastjórn og vonandi sem samfélag að taka það og gera úr því það sem við getum.“

Hann segir að upplýsingamiðlun og samskipti við íbúa hefðu mátt vera betri:

„Múlaþing hefur veitt umsagnir og þær hafa ekki verið hlutlausar. Við höfum alveg bent á að ná þurfi utan um íbúa. Það er alveg ljóst að við erum ekki leyfisveitendur. Umsagnir hafa undanfarið verið samþykktar samhljóða í nefndum og ráðum. Maður vonar að núna þegar þetta er komið að fólk muni koma og reyna að upplýsa íbúa hvernig þetta fer. Auðvitað eru fyrirtæki búin að halda einhverja fundi en það þarf að hreinsa aðeins loftið. Mér finnst stofnanir til dæmis sem veita leyfið ekki hafa verið að útskýra nægilega mikið hvernig þessi ákvörðun er tekin. Það væri gott að skýra ferlið. Það væri mjög gott fyrir marga að vita hvað þetta þýðir. HMS á til dæmis eftir að gefa út byggingarleyfi.“