Ögrandi her­ferð Sweeney gagnrýnd: „Get ekki lýst því hvað ég er reið“

Í herferðinni er Sweeney nakin og setur sig í stellingar nokkurra mismunandi íþróttagreina. Herferðin hefur sætt gagnrýni fyrir að kynlífsvæða íþróttir kvenna. Á meðal gagnrýnenda er fyrrverandi Ólympíufarinn og sundkonan Ariarne Titmus segist hafa haldið að svona „kjaftæði“ væri í fortíðinni.

„Ég get ekki lýst því hvað ég er reið yfir því að sjá þetta,“ sagði fjórfaldi Ólympíumeistarinn á Instagram-síðu sinni.

„Þetta er ekki aðeins högg í andlitið fyrir hverja þá konu sem hefur tileinkað líf sitt því að verða best í sinni grein, heldur fyrir allar konur sem njóta íþrótta fyrir það sem þær eru; samvinna, vinátta, staðfesta og samheldni.“

„Hvernig búum við enn í heimi þar sem kvenlíkaminn er fjárnýttur og kynlífsvæðing kvennaíþrótta er enn til?“ spyr Titmus.

Ekki alltaf sexý

Breski spretthlauparinn og fjórfaldi Evrópumeistarinn Amy Hunt tjáði sig einnig eftir að hafa lent í fjórða sæti í 200 metra hlaupi í keppni um helgina. Hún varpaði orðum sínum beint til Sweeney í viðtali eftir keppnina í gærkvöld:

„Sydney Sweeney, svona líta konur í íþróttum út,“ sagði Hunt við breska ríkisútvarpið, BBC.

Hún vísaði þá til tíma sigurvegarans Melissu Jefferson-Wooden, sem kom í mark á 21,47 sekúndum í hlaupi gærkvöldsins, fjórða besta tíma sögunnar.

„21,4. Vöðvar. Mikil vinna, blóð, sviti, tár,“ sagði Hunt og bætti við: „Þegar þú ert kona í íþróttum er það ekki fallegt. Það er ekki þokkafullt og það er ekki alltaf sexý, það er alveg klárt.“

Skaðlegt fyrir allar konur

Ástralska brimbrettakonan Feilicity Palmateer er litlu ánægðari með herferðina.

„Eftir situr algjör vantrú. Þetta eru rosalega mikil vonbrigði. Hversu mikið er hægt að draga kvennaíþróttir niður með einni 40 sekúndna auglýsingu?“ spyr Palmateer og bætir við:

„Þessi auglýsing Sydney Sweeney er mjög skaðleg, sérstaklega fyrir ungar konur sem eru að hefja sinn íþróttaferil, og bara fyrir konur í íþróttum og konur yfirhöfuð.“