Stór gul­rót í bak­garðs­hlaupinu í Heið­mörk: „Al­veg ó­skrifað blað“

Þú ætlar bara að hlaupa tíu hringi núna, af hverju er það?

„Það eru tíu hringir hjá mér. Það er akkúrat mánuður í landsliðskeppnina og við í íslenska landsliðinu ætlum að hlaupa um helgina og ætlum að taka svona eitthvað í kringum tíu hringi sem æfingu,“ segir Þorleifur Þorleifsson, Íslandsmethafi sem hefur mest hlaupið 62 hringi í bakgarðshlaupi. Það verður ekki vesen fyrir hann að hlaupa tíu hringi, meira vesen er að hætta að hlaupa.

„Jú, þetta er náttúrulega mjög gaman en svo er líka voðalega þægilegt að fara inn í þetta rólegur og vita að maður er bara að fara að hætta upp úr kvöldmat og getur þá farið heim og fengið sér kvöldmat og horft svo á keppnina í sjónvarpinu.“

Hvað gerist eftir fyrsta sólarhringinn?

Þú ert ríkjandi Íslandsmethafi í þessari grein og eins og þú segir, þið í landsliðinu eruð að fara að taka þetta sem æfingu. Það gerir það að verkum að við erum dálítið að fara inn í svona smá óvissu, er það ekki, með þessa keppni?

„Jú, það er enginn að fara að vinna þessa keppni sem hefur unnið áður. Það eru þrír keppendur þarna sem hafa farið 24 hringi eða lengra og svo eru nokkrir sem eru þarna í kringum tuttugu hringina. Þannig það verður mjög spennandi að fylgjast með þessu núna en það verður nýr sigurvegari núna.“

Talandi um þessa þrjá hlaupara sem hafa hlaupið sko sólarhring eða lengur. Erum við þá að tala um að keppnin hefjist ekki af alvöru fyrr en eftir sólarhring, ef svo mætti segja?

„Það sem er náttúrulega svolítið spennandi þegar maður er að horfa á þetta er hvað gerist þegar sólarhringur er liðinn. Hverjir halda áfram og fara af stað í hring 25? Við svona búumst við því að það verði sirka tíu sem halda áfram. Um 20 hlauparar áætla að fara 24 hringi eða lengra. Svo er spennandi að sjá hve margir af þeim ná því.“

Stór gulrót

Vinsældir bakgarðshlaupanna hér á landi hafa verið mjög miklar og þeir sem svona skara fram úr hafa orðið að stjörnum í greininni hérna heima.

„Fyrir áhorfendur þá er þetta hlaup bara alveg óskrifað blað og verður í rauninni mjög spennandi að horfa á. Þá eru náttúrulega fjórar vikur núna í landsliðsverkefni hjá okkur og val fyrir næsta landsliðsverkefni eftir það er í rauninni hafið. Á næstu tveim árum verða það þeir sem eiga flesta hringi sem verða í landsliðinu. Nú er því tækifæri fyrir fólk að stimpla sig inn. Lágmarkið núna inn í landsliðið er um 30 hringir. Það er því alveg gulrót fyrir hlaupara helgarinnar að fara þarna og koma sér inn í liðið.“

Veðurspá helgarinnar er frábær. Hægviðri.

„Það hefur oft verið ausandi rigning þannig að veðurspáin núna er alveg frábær. Við erum náttúrulega með tvær brautir þegar kemur að bakgarðshlaupum hér. Það er Heiðmörk og svo Öskjuhlíð og fólk skiptist í tvær fylkingar með það hvor brautin sé uppáhalds.Það sem er skemmtilegra við Öskjuhlíðina er að þar eru fleiri áhorfendur úti í brautinni og meira líf. Í Heiðmörk erum við aftur á móti með þægilegri stíga, möl og mýkra undirlag. Það reynir því aðeins minna á skrokkinn og kannski fallegra umhverfi í kringum brautina. Það getur líka oft verið þægilegra að vera meira einn. Það eru svona kostir og gallar við þetta.“

Það verður spennandi að fylgjast með bakgarðshlaupinu í Heiðmörk um helgina. Sýnt verður beint frá hlaupinu á fréttavefnum Vísi sem og á sjónvarpsstöðinni Vísi.