Innlent
Læknafélagið vill endubætur á vegum
Stjórn Læknafélags Íslands telur brýnt að gerðar verði viðunandi endurbætur á fjölförnum vegum við þéttbýli eins og þeim sem mesta umferð bera við höfuðborgina. Stjórnin telur sannað að úreltir vegir séu ástæða slysa sem orðið hafa á vegum landsins. Hún telur þó rétt að minna á að flest slys megi forðast með varlegum akstri og réttri notkun öryggisbúnaðar.
Glitnir spáir hækkun stýrivaxta
Hagstofa Íslands birtir verðbólgutölur í næstu viku. Greiningardeild Glitnir spáir því að vísitala neysluverðs muni hækka um 0,1 prósent á milli mánaða og muni verðbólga mælast 7 prósent. Deildin spáir því að Seðlabankinn muni hækka stýrivexti sína um 25 punkta 21. desember næstkomandi en segir það verða endirinn á hækkanaferli bankans.
Heildarútlán Íbúðalánasjóðs 44,6 milljarðar
Heildarútlán Íbúðalánasjóðs námu 4,7 milljörðum króna í nóvember. Þar af voru um 600 milljónir króna til leiguíbúðalána. Almenn útlán sjóðsins námu því um 4,1 milljörðum króna sem er um 3% aukning á milli mánaða. Heildarútlán sjóðsins á árinu nema ríflega 44,6 milljörðum króna.
Átján ára Selfyssingur handtekinn á Gaza-svæðinu
Átján ára Selfyssingur var handtekinn á Gaza-svæðinu um síðustu helgi og var honum haldið í gæsluvarðhaldi í fimm klukkustundir. Pilturinn hefur verið á ferðalagi um svæðið síðan í september á þessu ári.
Baugur orðaður við Allsaints
Breska dagblaðið Times segir Baug Group hafa náð samkomulagi um að kaupa 40 prósenta hlut í bresku tískuvöruverslanakeðjunni Allsaints af breska fjárfestingum Kevin Stanford. Stanford, sem er einn af stofnendum tískuvörukeðjunnar Karen Millen, var einn af meðfjárfestum Baugs í kaupunum á House of Fraser, sem gengu í gegn í október.
Sextugir fíkniefnasalar í Kópavogi
Lögreglan í Kópavogi fann fíkniefni á tveimur mönnum á sextugsaldri, sem voru saman í bíl í gærkvöldi. Í framhaldi af því var gerð húsleit hjá öðrum þeirra og fannst þá meira.
Prófkjörskostnaður var 2.615 krónur
Paul Nikolov, frambjóðandi Vinstrihreyfingarinnar - Græns framboðs, birti í gær uppgjör sitt vegna framboðs í forvali Vinstri - Grænna í Reykjavík og í Kraganum um liðna helgi. Heildarreikningur Nikolov er tvö þúsund sex hundruð og fimmtán krónur,og þá er með talið frímerkið á prófkjörstilkynninguna og hlýtur prófkjörskostnaðurinn að vera lægsti sem um getur.
Ölvaður ökumaður í þingholtum
Ölvaður ökumaður, sem lögreglan ætlaði að stöðva í Lækjargötu í nótt, gaf allt í botn og reyndi að stinga lögregluna af með þvi að aka upp í þingholtin. Þar stöðvaði hann bílinn og tók til fótanna, en lögreglumenn hlupu hann uppi.
Nýtt parhús reist í Grímsey
Hreppsnefndin í Grímsey fær afhent nýtt parhús um helgina sem ákveðið var að byggja í vor. Að sögn oddvita Grímseyjarhrepps, Brynjólfs Árnasonar, er þetta fyrsta sinn í 6 ár sem smiðshöggið er rekið á nýbyggingu í eynni.
Bílvelta norðan við Jökuldal
Lítil meiðsl urðu á ökumanni og farþega fólksbíls sem valt einn hring í mjúkum snjó á Háreksstaðaleið, norðan við Jökuldal í gærkvöldi. Lögregla dró bílinn upp á veginn og var hann keyrður á leiðarenda áfallalaust eftir það.
Fasteignasalar sviptir réttindum
Níu fasteignasalar hafa verið sviptir réttindum tímabundið, í tólf vikur hver. Morgunblaðið hefur það eftir Þorsteini Einarssyni formanni eftirlitsnefndar Félags fasteignasala, að þeir hafi ekki með fullnægjandi hætti skilað yfirlýsingum frá endurskoðendum í ágúst síðastliðnum, um fjárvörslu á síðustu tólf mánuðum.
Ungir ökuníðingar missa bílprófin
Þrír sautján ára piltar, með glæný ökuskírteini, voru teknir úr umferð í nótt eftir að hafa mælst á allt of miklum hraða. Tveir voru stöðvaðir á Reykjanesbraut, annar með sex daga gamalt bílpróf og hinn með tíu daga, og sá þriðji mældist á rúmlega 150 kílómetra hraða á Sæbraut, þar sem hámarkshraði er 60 kílómetrar á klukkustund.
Olíusamráðsdómur ekki fordæmi
Sýknudómur í gær, þar sem Essó er sýknað af skaðabótakröfu einstaklings vegna samráðs olíufélaganna, hefur ekki frodæmisgildi gagnvart bótakröfum Reykjavíkurborgar. Þetta segir Vilhjálmur Vilhjálmsson lögmaður sem rekur málið fyrir borgina.
Ritstjóri Kompáss sektaður
Lögreglustjórinn hefur sektað ritstjóra fréttaskýringaþáttarins Kompáss um fimmtíu og fjögur þúsund krónur fyrir vörslu fíkniefna. Þetta voru fíkniefni sem Kompás lét kaupa til að sýna auðvelt aðgengi barna að þeim en þau voru síðan afhent lögreglu með formlegum hætti.
Bandarískar hleranir á íslandi
Skjalfestar sannanir liggja fyrir um að bandarísk yfirvöld blönduðust með beinum hætti í hleranir íslenskra stjórnvalda á eigin þegnum á tímum kalda stríðsins. Utanríkisráðuneytið tregðast við að opinbera þessi skjöl og bíður eftir heimild eða leiðbeiningum frá Bandaríkjunum
Grunaður um að hafa aftur nauðgað
Maður á sextugsaldri situr í gæsluvarðhaldi grunaður um að hafa nauðgað konu á föstudag. Í október var sami maður dæmdur í fimm ára fangelsi fyrir hrottfengið ofbeldi og nauðganir.
Um hundrað merktir í tölvukerfi vegna bakteríunnar
Svokölluð Mosa-baktería hefur ekki fundist í þeim sýnum sem hafa verið rannsökuð á Landsspítalanum eftir að hún greindist í sjúklingi á þriðjudag. Búið er að rannsaka um helming sýnanna. Þeir sem eitt sinn hafa greinst með bakteríuna fara ávallt í einangrun við komu á sjúkrahús en um hundrað manns eru þannig merktir í kerfi Landsspítalans.
Kaupþing spáir einni breytingu á Úrvalsvísitölunni
Greiningardeild Kaupþings gerir ráð fyrir óbreyttri skipan 15 stærstu fyrirtækja í Úrvalsvísitölu Kauphallar Íslands á fyrri helmingi næsta árs. Einu breytinguna segir deildin vera þá að Atlantic Petroleum muni víkja fyrir Icelandic Group.
Jöklabréf halda uppi gengi krónunnar
Mikil styrking krónunnar á seinni hluta síðasta árs og auknar gengissveiflur á þessu ári hafa verið settar í samband við útgáfur jöklabréfa. Greiningardeild Landsbankans segir jöklabréfaútgáfuna hafa skilað verulega neikvæðri ávöxtun það sem af er árs.
Ólafur Ragnar og Al Gore í San Francisco
Forseti Íslands mun gera grein fyrir árangri Íslendinga í nýtingu jarðhita og hvernig sú kunnátta hefur stuðlað að samstarfsverkefnum víða um veröld, á samráðsfundi sem honum og Al Gore, fyrrverandi varaforseta Bandaríkjanna var sérstaklega boðið til, í San Francisco.
KB banki spáir stýrivaxtahækkun
KB banki spáir því að Seðlabankinn muni enn hækka stýrivexti á auka vaxtaákörðunarfundi, sem haldinn verður í bankanum tuttugasta og fyrsta desember.
Eldur í uppþvottavél
Eldur kviknaði í uppþvottavél í Torfufelli í Breiðholti klukkan hálfátta í gærkvöldi og talsverður reykur gaus upp í íbúðinni. Kona sem var í íbúðinni var skoðuð á staðnum og þótti ekki ástæða til að flytja hana á sjúkrahús, að sögn lögreglu. Greiðlega gekk að slökkva og reykræsta en skemmdir urðu af sóti.
Bæjarráð Hornafjarðar vill að vinna við jarðgöng hafi forgang
Bæjarráð Hornafjarðar hvetur til að 200 milljónir sem ætlaðar eru til lagfæringar á veginum um Hvalnes- og Þvottárskriður verði frekar notaðar til að hefja undirbúning jarðganga undir Lónsheiði. Fréttavefurinn horn.is greinir frá þessu.
Landhelgisgæslan sótti mann á Patreksfjörð
Sjúklingur á sjúkrahúsinu á Patreksfirði fár veiktist í nótt og kölluðu læknar á þyrlu Landhelgisgæslunnar til að sækja hann og flytja á Landsspítalann í Reykjavík.
Týndur fiskibátur finnst
Þyrla af danska varðskipinu Triton fann undir kvöld í gærkvöldi fimmtán tonna fiskibát, norðvestur af Garðskaga, eftir að hann hvarf út úr sjálfvirku tilkynningaskyldunni og ekki náðist samband við skipverjana tvo, hvorki í gegnum talstöð né farsíma.
Jólaleyfi þingmanna seinkað
Ekkert verður af því að jólaleyfi þingmanna hefjist á morgun eins og áætlað var. Ekkert samkomulag náðist um farmhald þingstarfa á fundum þingflokkaformanna í gærkvöldi, og búist er við að langir vinnudagar séu framundan á þinginu.
Landsbankinn spáir 7,1 prósents verðbólgu
Greiningardeild Landsbankans gerir ráð fyrir að vísitala neysluverðs hækki um 0,2% í desember. Gangi þetta eftir verður 12 mánaða hækkun vísitölunnar 7,1% í jólamánuðinum, sem er lækkun úr 7,3% frá síðasta mánuði.
Lögregla kölluð í heimahús vegna deilna um tölvunotkun
Lögreglan í Reykjavík var kölluð út nokkrum sinnum í gær vegna heimiliserja. Ágreiningurinn var af ýmsum toga en í einu tilfelli var rifist um tölvunotkun unglingsins á heimilinu. Þar hafði ástandið farið úr böndunum en lögregla segir ekki um einsdæmi að ræða.
Fjölskylduhjálp fær tvær milljónir
Fjölskylduhjálp Íslands fékk klukkan tvö í dag afhenta ávísun upp á tvær milljónir króna en það er sölugróði af geisladisk sem seldur var til styrktar henni.
Egils Premium hlaut silfurverðlaun í Bæjaralandi
Egils Premium sem Ölgerðin framleiðr hlaut silfurverðlaun í flokki hátíðarbjóra (Festival Beers) í European Beer Star keppninni, sem samtökum ölgerða í Bæjaralandi standa fyrir. Í sömu keppni fékk Egils Lite bronsverðlaun í flokki mildra bjóra.
