Tottenham minnir á Ajax

Hollenski miðjumaðurinn Edgar Davids segir að ungt lið Tottenham í dag minni hann á Ajax-liðið sem hann spilaði með í byrjun tíunda áratugarins, en það lið vann hollensku deildina þrjú ár í röð og sigraði í Meistaradeildinni.

"Það er margt líkt með þessum tveimur liðum og það sem er mikilvægast fyrir unga leikmenn Tottenham er að hafa trú á getu sinni og að þroskast og bæta sig sem knattspyrnumenn. Við erum enn með tiltölulega ungt lið og mér þykir mjög spennandi að vera partur af því," sagði hinn 32 ára gamli Davids.

"Það verða allir að leggja hart að sér og reyna að ná stöðugleika í deildinni. Það sem mér finnst mikilvægast er að allir vilja bæta sig hérna. Það er enn of snemmt að dæma um hvernig þetta lið stendur í deildinni, en ég held að við séum að færast í átt til liða eins og Arsenal, sem við miðum okkur gjarnan við," sagði Davids.