Pepe: Cristiano Ronaldo er betri en Messi

Pepe leikmaður Real Madrid segir að Cristiano Ronaldo sé betri en Lionel Messi hjá Barcelona þar sem að Ronaldo sé mun fjölhæfari leikmaður en Argentínumaðurinn. Pepe er nýkomin aftur inn í lið Real Madrid eftir að hafa verið dæmdur í tíu leikja bann í fyrra fyrir að ráðast á mótherja.

„Cristiano Ronaldo er betri leikmaður af því hann getur skorað með skalla, með báðum fótum og úr aukaspyrnum ásamt því að leggja upp mörk fyrir félaga sína," sagði Pepe við spænska blaðið Marca en spænskir fjölmiðlar gera fátt annað þessa dagana en að reyna að komast að því hvor sé betri Cristiano Ronaldo eða Lionel Messi.

„Ronaldo er mjög góður leikmaður sem getur gert ótrúlega hluti. Hann er mikill keppnismaður sem er tilbúinn að leggja mikið á sig og hann mun hjálpa okkur mikið," sagði Pepe.