Börsen: Íslendingar fá 20 milljarða aukalega frá FIH

Viðskiptasíðan börsen.dk segir að sökum þess hve markaðsskráning skartgripaframleiðendans Pandóru gekk vel í dag sé allt útlit fyrir að Seðlabanki Íslands og skilanefnd Kaupþings fá einn milljarð danskra kr, eða 20 milljarða kr. aukalega fyrir söluna á FIH bankanum.

Í umfjöllun börsen er rifjað upp ákvæði í samningum um söluna að Selabankinn og Kaupþing myndu njóta hagnaðar af eignarhlut FIH í Axcel III sjóðnum. Sá sjóður hefur hagnast um hátt í 300 milljarða kr. á sölu á hlutum í Pandóru í kauphöllinni í Kaupmannahöfn. Skráningargengið við upphaf markaðarins var 210 dkr. á hlut en gengið endaði 20% hærra í lok dagsins.

FIH bankinn átti 10% í Axcel sem aftur átti 60% í Pandóru. Bara í dag seldi Axcel hluti fyrir 10 milljarða danskra kr. sem þýðir að 600 milljónir danskra kr. runnu beint til FIH og þaðan til Seðlabankans og Kaupþings. "Við eigum erfitt með að hætta að brosa," segir Henrik Sjøgreen bankastjóri FIH. "Okkur sýnist sem milljarður hafi bæst ofan á söluverð FIH."

Axcel hefur langt í frá selt alla hluti sína í Pandóru en fram kemur í börsen að ef gengið haldist í núvernandi stöðu næstu daga mun aukagreiðslan til Seðlabankans og Kaupþings nema einum milljarði danskra kr.